Бейсатов Сапар Шәкенұлы

1931 жылғы 20 мамырда Омбы облысы, Русско-полянский ауданы, Жасқайрат селосында дүниеге келген. Ұлты қазақ, жоғары білімді. Әжесінін қолында тәрбиеленген.
1938 жылы оқуға барып, 1945 жылы толық емес орта мектепті бітірді. Мектепті бітірген соң, Ақмола станциясындағы № 4 темір жол училищесіне оқуға түседі де IV раз-рядты токарь мамандығын алып шығады. 1947 жылдан бастап 1948 жылдын тамыз айына дейін Ақмола станциясындағы депода токарь болып жұмыс істеді.
1951 жылғы сәуір айынан , 1955 жылғы қазан айына дейін Кеңес Армиясы қатарында қызмет атқарды. Әскер қатарынан оралғаннан кейін, 1956 жылдың мамыр айынан бастап еңбек жолын бастады. Комсомолдық жолдамамен Қазақстан Магниткасының құрылысын салуға Теміртау қаласына келді, бетоншы, монтажшы, «Қазметаллургкұрылыс» тресінде кешенді бригаданың бригадирі болып жұмыс істеді.
1960 жылдан 1996 жылға дейін «Қарағандытұрғынүйқұрылыс» тресінде еңбек етті. Қатардағы шеберден аға инженерге дейінгі еңбек жолынан өтті. Осы уақыттан бастап С.Ш.Бейсатовтың қызметі Қарағанды қаласымен байланыста болды. Қаладағы тұрғын үйлердің және өндірістердің объектілерін құрастыру мен монтаждау оның жұмысты ұйымдастыра білуімен байланысты болды. Оның тікелей қатысуымен Қарағанды қаласы Орталық Қазақстандағы әдемі қалалардың біріне айналды. С.Ш.Бейсатовтың жеке басының қасиеттері, оның жұмысқа деген қабілеттілігі, ұйымдастырушылық дарындылығы, қарапайымдылығы айналасындағы адамдардың оған деген үлкен кұрметін тудырды.
Ол 1958 жылы Теміртау қаласы комсомол ұйымының атынан Қазақстан ЛКЖО IX съезінің және БЛКЖО XIII съезінің делегаты болды.
С.Ш.Бейсатовтың еңбектегі жетістіктері «Еңбек Қызыл Ту» ордені, «Еңбектегі ерлігі үшін», «Еңбекте үздік шыққаны үшін» медальдары, «Саланың үздігі», «Еңбек ардагері» белгілері сияқты үкімет наградаларымен марапатталды. Қарағанды қаласының кұрылысына қосқан зор үлесі, қаланың қоғамдық-саяси өміріне белсене ат салысқаны үшін 1999 жылғы 11 тамызда оған «Қарағанды қаласының Құрметті азаматы» атағы берілді.
Атақ берілген күні: 1999 жылы 11 тамыз