Жыңғылды ауылында «Жыл үздіктері – 2025» шарасы аясында, сондай-ақ Жұмысшы мамандықтар жылы қарсаңында «Еңбек адамы» номинациясы бойынша бірқатар сала қызметкерлері марапатталды. Аталған шараның басты мақсаты – адал еңбегімен ел дамуына үлес қосып жүрген еңбек адамдарының еңбегін бағалау және қоғамда жұмысшы мамандықтарының мәртебесін арттыру.
Салтанатты шара барысында Жыңғылды ауылының әкімі Әсет Маратұлы марапат иелерін шын жүректен құттықтап, ауылдың әлеуметтік-экономикалық дамуына қосқан сүбелі үлестері үшін алғыс білдірді. Сонымен қатар, еңбекқор жандарға зор денсаулық, отбасыларына амандық, алдағы жұмыстарына толағай табыс пен жаңа жетістіктер тіледі.
Бұл марапат — маңдай терімен, адал еңбегімен елге қызмет етіп жүрген азаматтарға көрсетілген зор құрметтің айғағы. Еңбек адамын дәріптеу – ұрпаққа үлгі, қоғамға өнеге.
Шара соңы Таушық ауылынан келген өнерпаздар мен Жыңғылды ауылының өнерпаздары ұсынған мерекелік концерттік бағдарламамен жалғасты. Концерт барысында әсем әндер шырқалып, ұлттық би мен көркем өнер туындылары көрермендерге көтеріңкі көңіл күй сыйлады. Өнерпаздардың мазмұнды әрі әсерлі қойылымдары шараның мән-маңызын арттырып, мерекелік кеш жоғары деңгейде өтті.
Жаңа 2026 жыл мерекесімен құттықтай отырып, барша ауыл тұрғындарына зор денсаулық, отбасыларына амандық, ел бірлігі мен тыныштық, еңбекте табыс пен мол жетістіктер тілейміз. Жаңа жыл әр шаңыраққа қуаныш, береке және жаңа мүмкіндіктер әкелсін!
Садақ — қазақ халқының қасиетті қаруы. Жаугершілік дәуірде мергендер ел қорғаны болып, ерлігімен танылған. Бүгінде садақ ату спорты жастарды дәлдікке, ептілікке, шыдамдылыққа тәрбиелеп, денсаулығын нығайтады.
Маңғыстау облыстық Дәстүрлі садақ ату және Жамбы ату федерациясының филиалы ретінде ашылған орталықта қазіргі уақытта 26 бала садақ атумен тұрақты түрде шұғылданады.
Орталық жетекшісі, республикалық және халықаралық жарыстардың жеңімпазы Мәдина Мұратова:
“Дәстүрлі садақ ату бүгінде қарқынды дамып, оған қызығушылық артып келеді. Себебі садақ ату — біздің ертеден келе жатқан асыл дәстүріміз. Ол тек ұлттық ойын емес, ата-бабамыздың бізге қалдырған мұрасы. Алдағы жылы өтетін ҚР чемпионатында жеңіс тұғырынан көріну – басты мақсатымыз,” – деді.
Ашылу салтанатына Маңғыстау облыстық Дәстүрлі садақ ату және Жамбы ату федерациясының Президенті Сәнім Ізбасарқызы мен аудандық мәдениет, дене шынықтыру және спорт бөлімінің басшысы М. Дуланова қатысып, орталық жұмысына сәттілік тіледі.
Сонымен қатар, Маңғыстау аудандық мәдениет, дене шынықтыру және спорт бөлімінің ұйымдастыруымен Жыңғылды ауылындағы «Садақ ату» орталығында дәстүрлі садақ атудан облыстық ашық турнир өтті. Жарысқа қала және аудан спорт мектептерінен 70-ке жуық садақшы қатысып, өз шеберліктерін көрсетті.
Аудан әкімі Ғалымжан Ниязов жұмыс сапарымен Жыңғылды ауылына барды. Сапар барысында елді мекендегі бірқатар әлеуметтік және инфрақұрылымдық нысандардың жұмысымен танысты. Алдымен әкім Е. Айшуақұлы атындағы орта мектепке барып, білім беру мекемесінің оқу үдерісі мен материалдық-техникалық базасын қарап шықты. Одан кейін құрылысы аяқталуға жақын ветеринарлық пункт пен ағымдағы жөндеу жасалған амбулаторияның жұмыс жағдайын көрді. Ауыл тұрғындарына көрсетілетін ветеринарлық және медициналық қызметтердің қолжетімді әрі сапалы болу қажеттігін атап өтті. Сапар соңында аудан басшысы жеке қабылдау өткізіп, ауыл тұрғындарының өтініштері мен ұсыныстарын тыңдады. Қабылдауда жұмысқа орналасу, ауылды абаттандыру, мобильді байланыс қуатын арттыру, тоқ мәселелері көтерілді. Әкім барлық сұрақты бақылауға алып, жауапты бөлім басшыларына нақты тапсырма берді.
Бүгінгі күнді оқу-ағарту министрлігі “Балалар үні” деп жариялаған еді. Соған орай, Жыңғылды ауылының әкімі Әсет Маратұлы ауылымыздағы Есір Айшуақұлы атындағы ЖББМ-нің 6-сынып оқушыларымен кездесу өткізді. Кездесуде оқушылар өз жетістіктері, болашаққа деген армандары және табысқа жету жолындағы іс-әрекеттерімен бөлісті. Балалардың дарыны мен талпынысы - болашағымыздың кепілі.
Сонымен қатар, Балалар ауылдағы өмір сапасын жақсарту бойынша ұсынатын идеяларымен бөлісіп, өз ұсыныстарын жеткізді. Әрбір баланың үні маңызды, оны есту - біздің парызымыз.
Кездесу соңында балаларды келе жатқан 1-маусым халықаралық балаларды қорғау күнімен құттықтап, оларға жарқын болашақ, биік белестер, сарқылмас шабыт тіледі.