GOV.KZ – Мемлекеттік органдардың цифрлық ресурстарының бірыңғай платформасы

Ақтауда жалпыхалықтық жүгіру марафоны өтті

Маңғыстау облысының жастар саясаты мәселелері жөніндегі басқармасының қолдауымен «Сақтан» жобасы аясында жастар арасында жалпыхалықтық жүгіру өтті. Спорттық іс-шара жастар арасында синтетикалық есірткілер мен психотропты заттарды тұтынудың және оларға әуестіктің алдын алуға бағытталған.

Халықаралық нашақорлыққа қарсы күрес күніне орай өткен жалпыхалықтық жүгіру марафонына 300-ден астам жас қатысты. Олар 3 км және 5 км қашықтықта жүгіріп, есірткіге қарсы қоғамдық көзқарасты қалыптастыруға өз үлесін қосты.

Әрбір қатысушыға арнайы бастапқы жиынтық (футболка, шоппер және су бөтелкесі) табысталды. Сонымен қатар, мәреге жеткен барлық қатысушыларға арнайы естелік медаль берілді.

Іс-шараның басты мақсаты – жастар арасында денсаулыққа зиян келтіретін әдеттердің алдын алу, бұқаралық спортты дамыту және жастарды белсенді өмір салтын ұстануға ынталандыру. Ұйымдастырушылардың айтуынша, мұндай іс-шаралар жастардың бос уақытын тиімді өткізуіне, олардың физикалық белсенділігін арттыруға және қоғамда салауатты құндылықтарды нығайтуға ықпал етеді.

Марафон барысында қатысушылар жоғары белсенділік танытып, спорттық рух пен ұйымшылдықтың үлгісін көрсетті. Жүгіру бағыты бойында қауіпсіздік шаралары қамтамасыз етіліп, еріктілер мен медицина қызметкерлері кезекшілік атқарды.

Үздік нәтиже көрсеткен қатысушылар арнайы дипломдармен және бағалы сыйлықтармен марапатталды.

Бүгін, 17 желтоқсан күні Ақтау қаласында «Жас тұлпар – 2025» облыстық жастар премиясын салтанатты табыстау рәсімі өтті. Іс-шараға облыс әкімінің орынбасары Ербол Ізбергенов қатысып, жеңімпаздарды өңір басшысының атынан құттықтады.

Облыстық премия аясында білім мен ғылым, медицина, кәсіпкерлік, спорт, мәдениет, бұқаралық ақпарат құралдары және қоғамдық қызмет салаларында жетістікке жеткен жастар 12 номинация бойынша марапатталды. Атап айтқанда, «Үздік жас ғалым», «Үздік жас мұғалім», «Үздік жас дәрігер», «Жас көшбасшы», «Бейбіт күннің батыры», «Жыл жаңалығы» сынды номинациялар бойынша үздіктер анықталды.

Іс-шараға өңірдің белсенді жастары, волонтерлер, спортшылар, қоғамдық ұйым өкілдері мен аудан-қала жастары қатысып, жалпы саны 300-ге жуық адамды қамтыды.

Салтанатты жиында сөз сөйлеген Ербол Ізбергенов өңірде мемлекеттік жастар саясаты жүйелі түрде іске асырылып жатқанын жеткізді.

– Мемлекет басшысы Қасым-Жомарт Тоқаев жастарды қолдаудың, олардың отаншыл, білімді, еңбекқор және әділ болып қалыптасуының маңызын үнемі атап өтеді. Маңғыстауда облыс халқының 30 пайыздан астамы жастар. Жастарды қолдауға бағытталған жобалар мен бағдарламаларға мемлекеттен қаржы бөлініп, баспана, гранттар мен волонтерлік бастамалар іске асырылуда. Бұл үрдіс алдағы уақытта да жалғасын табады. «Жас тұлпар» сыйлығы – ел дамуына үлес қосып жүрген жастарды ұлықтайтын маңызды марапат. Ел игілігі үшін жасап жатқан қызметтеріңізге алғысымды білдіремін! Әрбір бастамаларыңызға сәттілік тілеймін! – деді ол.

Ақтауда өтіп жатқан «Mangystau CUP» республикалық пікірсайыс турнирі өз жалғасын табуда.

Биылғы турнирге 50-ден аса команда өтінім берген, олардың ішінде 32 команда ресми түрде қатысып, алғашқы күнгі іріктеу кезеңінде 4 айналым бойынша сайысқа түсті.

Екінші күні өткен қорытынды рейтинг нәтижесінде еліміздің 11 аймағынан келген 16 үздік команда келесі кезеңге жолдама алды. Іріктеуден өткен өңірлер қатарында Орал, Алматы, Астана, Ақтөбе, Ұлытау, Қызылорда, Қостанай облыстарының командалары бар.

Іріктеуден кейін плей-офф, ширек финал және жартылай финал ойындары ұйымдастырылды.

Жартылай финалда Астана, Алматы, Ақтөбе және Атырау қалаларынан келген 4 команда бақ сынап, ақтық сынға 2 команда жолдама алды.

Маңғыстауда облыстық жастар саясаты мәселелері жөніндегі басқармасының ұйымдастыруымен облыс әкімінің кубогі үшін «Mangystau CUP» республикалық пікірсайыс турнирі басталды.

Турнир өңірде іске асырылып жатқан «Soz battle» жобасының жалғасы ретінде ұйымдастырылып отыр.

Облыстық жастар саясаты мәселелері жөніндегі басқармасының басшысы Мұқаш Оралбай турнирдің басты мақсатын атап өтті.

-Турнирдің басты мақсаты – Маңғыстаудағы пікірсайыс қозғалысын күшейту, сыни ойлайтын, интеллектуалды әлеуеті жоғары жас буынды қалыптастыру. Биылғы сайысқа еліміздің 14 өңірінен 80-ге жуық пікірсайысшы қатысып, екі күн бойы бақ сынайды. Бір күндік ойын форматы 6 турдан тұрады, - деді Мұқаш Оралбай.

Екі күнге созылатын «Mangystau CUP» пікірсайыс турнирі өңір жастарының зияткерлік әлеуетін арттыруға, талдау және шешім қабылдау дағдыларын дамытуға, жалпы дебат қозғалысының жандануына септігін тигізеді.

Ақтауда облыстық жастар саясаты мәселелері жөніндегі басқармасының ұйымдастыруымен облыс әкімі кубогі үшін дәстүрлі «Mangystau CUP» республикалық пікірсайыс турнирінің ашылу салтанаты өтті.

Турнирдің ашылу рәсіміне Маңғыстау облысы әкімінің орынбасары Аббат Өрісбаев, облыстық жастар саясаты мәселелері жөніндегі басқарманың басшысы Мұқаш Оралбай, бас төреші Тұрақбай Қалдығали, сондай-ақ пікірсайыс қауымдастығының өкілдері қатысты.

Ашылу барысында Аббат Өрісбаев өңір жастарына көрсетіліп жатқан қолдаудың маңыздылығын атап өтті.

-Маңғыстау облысында жастар саясатына ерекше көңіл бөлінуде. «Ақтау – Түркі әлемінің мәдени астанасы» жобасы, жастар форумы, бүгінгі «Mangystau CUP» турнирі - барлығы жастардың дамуына бағытталған маңызды бастамалар. Ауқымды шараларда жастардың белсенділігі ерекше. Бүгінгі додаға еліміздің түкпір-түкпірінен келген қатысушыларға сәттілік тілеймін. Төрешілер әділ бағасын береді деп сенемін, - деді Аббат Өрісбаев.

Турнир ұйымдастырушысы, облыстық жастар саясаты мәселелері жөніндегі басқарманың басшысы Мұқаш Оралбай шараның мақсаты мен жастар үшін маңызын атап өтті.

-«Mangystau CUP» - өңірдегі пікірсайыс қозғалысын дамытуға серпін беретін ірі жоба. Біздің мақсатымыз - сыни ойлай алатын, өз көзқарасын дәлелдей білетін, зияткерлік деңгейі жоғары жас буынды қалыптастыру. Биылғы турнирдің негізгі тақырыбы - аймақтың әлеуметтік-экономикалық дамуы. Қатысушылар осы бағытта өз ұсыныстарын ортаға салады, - деді Мұқаш Оралбай.

«Mangystau CUP» турниріне еліміздің 14 өңірінен 80-ге жуық дебатшы қатысып отыр. Екі күнге жоспарланған зияткерлік дода өңірдегі пікірсайыс қозғалысын жандандырып, жастардың білім мен шешендік қабілетін дамытуға ықпал етпек.

Ақтауда Маңғыстау облыстық жастар саясаты мәселелері жөніндегі басқармасының бастамасымен «Жыл волонтері – 2025» байқауының салтанатты марапаттау рәсімі өтті.

Іс-шараның негізгі мақсаты - қоғам игілігі жолында белсенді еңбек етіп жүрген еріктілерді көпшілікке таныстыру, олардың қоғамдағы рөлін арттыру және азаматтық жауапкершілікті кеңінен насихаттау.

Биылғы марапаттау кешінде қоғамға оң әсер етіп, қайырымдылық пен қоғамдық бастамаларды дамытуға үлес қосып жүрген үздік еріктілер мен ұйымдар 10 номинация бойынша анықталды. Атап айтқанда, «Үздік бастамашыл топ» номинациясымен «Жасыл жебе» экоактивистер клубы, «Үздік волонтерлық ұйым» номинациясымен «Ана махаббаты» ҚҚ, «Жануарлар жанашыры» номинациясымен Азамат Сәрсенбаев, «Жүректен жүрекке» номинациясымен Нұрбек Шүкірбаев, «Қоғам игілігі үшін» номинациясымен Анатолий Мальцев, «Табиғат қорғаушысы» номинациясымен Айымгүл Сүлейменова, «Жақсылықтың жанашыры» номинациясымен Шынар Құрмет, «Инклюзивті келешек» номинациясымен Алия Алимуханбетова, «Мейірімді оқу орны» номинациясымен Ш. Есенов атындағы Каспий мемлекеттік технологиялар және инжиниринг университеті, «Салауатты қоғам» номинациясымен Шапағат Ізбенов марапатталды.