ҚР АҚДМ этносаралық қатынастар саласының мамандары үшін этнопсихология бойынша тренингтер өткізді

2021 жылғы 30 маусымда ҚР Ақпарат және қоғамдық даму министрлігі этносаралық қатынастар саласындағы мемлекеттік саясатты жүзеге асыратын мамандарға арналған «Қазақстанның этностық топтары арасындағы өзара қарым-қатынастардың психологиялық ерекшеліктері» тақырыбында онлайн тренингті өткізді.

Тренингке жергілікті атқарушы органдардың, этномәдени бірлестіктердің, ҮЕҰ, ҚХА қоғамдық құрылымдарының өкілдері, сондай-ақ өңірлік басшылар мен БАҚ редакторлары қатысты.

Тренинг барысында этникалық топтар арасындағы қарым-қатынастардың әлеуметтік-психологиялық ерекшеліктері, этносаралық қатынастардың экономикалық және демографиялық өлшемі, этносаралық саланы ақпараттық сүйемелдеудегі журналистік этика және басқа да өзекті мәселелер қарастырылды.

ҚР АҚДМ Этносаралық қатынастарды дамыту комитеті төрағасының орынбасары Айбек Жақсыбаев елдегі бейбітшілік пен келісім ахуалын нығайту бойынша жұмыстың басты басымдықтарын белгілеп, ақпараттық жұмыстың сапасын жақсарту бойынша ұсыныстар берді.

Айбек Жақсыбаев Комитеттің осы саланың өзекті тақырыптары бойынша ынтымақтастық үшін қоғам пен журналистерге ашық екендігін атап өтті.

Сонымен қатар, тренинг барысында елдегі этносаралық мәселелерді ақпараттық жарықтандыру кезіндегі этносаяси терминологияға ерекше назар аударылды, жанжалды ақпараттық сүйемелдеудің үлгілері мен деструктивті факторлары егжей-тегжейлі талданды, нақты қақтығыстарды анықтауға ықпал ететін және шиеленісті күшейтуге ықпал ететін ақпараттандыру тәсілдері, дезинформациямен күрес тәсілдері көрсетілді.

Тренинг қорытындысы бойынша қатысушыларға сертификаттар берілді, ал жергілікті атқарушы органдарға этносаралық қатынастарды нығайтуға бағытталған жұмыстарды ұйымдастыру бойынша ұсыныстар берілді.