Олимпиадада журналистер сауалына қазақ тілінде жауап берген Токио Олимпиадасының қола жүлдегері Софья Берульцева «Egemen Qazaqstan» газетінің тілшісіне қазақ тілінен бөлек, орыс, ағылшын және түрік тілінде еркін сөйлей алатынын айтты.
"Әр нәрсені үйрену үшін ниет пен ынта керек. Көршілеріміздің көбі – қазақ отбасылары. Кішкентай кезімнен көршілеріміздің сөйлегеніне қатты қызығатынмын. Ата-анама қазақша сөйлегім келеді дейтінмін. Сосын олар мені балабақшаға қазақ тобына берді. Көп уақыт өтпей-ақ топтағы балалармен, көршілермен қазақ тілінде еркін сөйлей бастадым. Мектепті, университетті орыс тілінде оқығаныммен бүгінде қазақ тілінде еркін сөйлей аламын. Ағылшын тілін жақсы меңгердім. Түрік тілін де кейіннен үйреніп алдым" - деп, бірнеше тіл үйренуінің сырымен бөлісті Софья.
Жуырда Олимпиада жүлдегері Президенттің Жарлығымен «Құрмет» орденімен марапатталғанын атап өткен жөн.