9 қазанда мобильді топ Қызылжар ауданының Архангельское және Красная Горка ауылдарына барды.
Сапар барысында өмірлік қиын жағдайға тап болған отбасылар, толық емес және қолайсыз отбасылар, сондай-ақ пробация қызметінің есебінде тұрған азаматтар тұратын отбасылар араланды. Сонымен қатар жұмыссыз, білім алмайтын және кәсіби даярлықтан өтпейтін NEET санатындағы жастарға ерекше назар аударылды.
Отбасылармен құқық бұзушылықтардың алдын алуға, әлеуметтік мәселелерді анықтауға және қажетті қолдау түрлерін айқындауға бағытталған профилактикалық әңгімелер жүргізілді. Мамандар азаматтарға әлеуметтік көмек алу мүмкіндіктерін түсіндіріп, қиын жағдайдан шығу жолдарын қарастыру бойынша кеңестер берді.
Сапар қорытындысы бойынша екі отбасы Отбасын қолдау орталығының әлеуметтік сүйемелдеуіне алынды. Бұл отбасыларға қажетті көмекті көрсету, олардың әлеуметтік жағдайын жақсарту және туындаған мәселелерді шешуге жәрдемдесу мақсатында тиісті жұмыстар жүргізілетін болады.
Сонымен қатар пробация қызметінің есебінде тұрған төрт азаматтың тұрғылықты жері тексеріліп, олардың жағдайына назар аударылды.
Іс-шараға пробация қызметінің басшысы, Жастар ресурстық орталығының өкілдері, учаскелік полиция инспекторы және Отбасын қолдау орталығының мамандары қатысты.
Мұндай бірлескен жұмыстардың негізгі мақсаты – құқық бұзушылықтардың алдын алу, әлеуметтік қолдауды қажет ететін отбасыларды дер кезінде анықтау, азаматтарға қажетті көмек көрсету және жастардың қоғамға бейімделуіне ықпал ету.
Мобильді топтың жұмысы халықтың әлеуметтік осал топтарына қолдау көрсетуге, отбасылардың әл-ауқатын жақсартуға және құқық бұзушылықтардың алдын алуға бағытталған.