Дамыту сабақтары – жаңа жетістіктерге бастар қадам
Оңалту кабинетінде аптасына екі рет мүгедектігі бар балалар мен 18 жастан асқан психоневрологиялық аурулары бар адамдарға арналған дамытушы сабақтар өткізіледі. Бұл сабақтар танымдық қабілеттерді, зейінді, есте сақтауды, сөйлеу тілін және ұсақ моториканы дамытуға бағытталған. Осындай сабақтар олардың жаңа дағдыларды меңгеруіне, өз бетінше әрекет ету қабілетін дамытуына және қоршаған ортамен сенімді қарым-қатынас жасауына ықпал етеді.
Сабақ барысында қатысушылар ойын түрінде қызықты тапсырмалар орындайды: карточкаларды құрастырады, әріптер мен суреттерді үйренеді, логикалық ойлау және қарым-қатынас жасау дағдыларын дамытады. Әлеуметтік қызметкерлер әрбір қызмет алушыға ерекше көңіл бөліп, мейірімді әрі қолдаушы орта қалыптастырады.
Мұндай кездесулер балалардың интеллектуалдық дамуына ғана емес, олардың қоғамға бейімделуіне де оң әсерін тигізеді.