Қызылжар ауданында пробациялық бақылауда жүрген ер адамға өмірін жаңадан бастауға көмектесті. Еламан Нұрмағанбетов пен оның жұбайы жұмысқа орналастырылып, балаларына балабақшадан орын берілді. Сонымен қатар, отбасына жер телімі бар үй берілді. Көмек аудан прокуратурасының үйлестіруімен көрсетілгенін Qazaqstan Media хабарлады.
Еламан Нұрмағанбетов Түркістан облысының тумасы. Оның жоғары білімі, әскердегі қызметі және Астанада жұмыс тәжірибесі бар. Бірнеше жыл бұрын оның өмірінде бетбұрыс кезең болып, содан кейін көп нәрсені қайтадан бастауға тура келген.
Ол Солтүстік Қазақстан облысына кездейсоқ келмеген. Ер адамның айтуынша, бірде Петропавлда болып, дәл осы жерде — тыныш, табиғатқа жақын жерде өмір сүргісі келетінін түсінген. Кейін жұбайы және екі кішкентай қызымен бірге Қызылжар ауданына қоныс аударған.
Пробациялық есепке қойылғаннан кейін ер адам көмек сұрап жүгінген. Қызылжар ауданының мансап орталығында оның жағдайына жедел назар аударылды. Бірнеше күннің ішінде Еламанға жергілікті ЖШС-тердің бірінен жұмыс табылды. Жұбайы асханаға аспаз көмекшісі болып орналасты, ал балалары балабақшаға қабылданды.
Алғашында отбасы жалдамалы пәтерде тұрған. Алайда бір айға жетпей Нұрмағанбетовтер қоныс аудару бағдарламасы бойынша жер телімі бар үйге ие болды.
«Үй шағын — 47 шаршы метр, бірақ барлық қажетті жағдайы бар: су кіргізілген, септик орнатылған, бөлмелері кең әрі бұрынғы иелерінен қалған жөндеу жұмыстары бар. Қазір үйге біртіндеп үйреніп, қоныстанып жатырмыз», — дейді отағасы.
Еламан ауыл шаруашылығымен айналысқысы келеді. Алғашқыда қаз өсіруді жоспарлап, оған қолайлы жерді де қарап қойған. Ол адам ерінбей, шынымен жақсы өмір сүруге ұмтылса, бәріне қол жеткізе алатынына сенімді.