2024 жылдың І жартыжылдығына білім саласы бойынша атқарылған жұмыстар туралы

Аудандағы 37 мектепке дейінгі ұйымда (10 мемлекеттік, 26 жекеменшік,1 шағын орталық) 2577 бала тәрбиеленуде. 3 жастан 6 жасқа дейін балаларды қамту көрсеткіші 97%. Жеке балабақшалардың үлесі 63,8%. 26 жекеменшік балабақшаның 15-і кентте, 11-і ауылдық жерде орналасқан.

Кентте орналасқан 5 балабақшаның (Арай, Жауқазын, Күншуақ,№19 санаторий, Ақмаржан) 3-уі ( Күншуақ, №19 санаторий, Ақмаржан) табиғи газбен жылыту жүйесіне қосылды. Арай, Жауқазын балабақшасын газ жүйесіне қосуға жоба сметалық құжатын дайындауға бюджеттік өтінім тапсырылды.

Ауданда 20 мектеп жұмыс жасайды. Оқушы саны 6695.

2024-2025 оқу жылында бірінші сыныпқа барлығы 647 оқушы қабылданды.

2024 жылы  мектепті 420 түлек аяқтады.  18 түлекке «Алтын белгі» табысталды.

Жалпыға міндетті оқу қоры аясында тиісті көмек түрлерін алатын арнайы санаттағы отбасылардан шыққан (тұрмысы төмен, әлеуметтік аз қамтылған) 4756 бала ыстық тамақпен қамтылуда (2100 бала АӘК (АСП) алатын, аз қамтылған отбасы балалары, 2656 1-4 бастауыш сынып оқушылары).

Бұқарбай ауылындағы №33 мектеп ғимаратына күрделі жөндеуге байланысты жобалық-сметалық жұмыстары әзірленіп, мемлекеттік сараптамадан өткізілді. Бүгінгі таңда күрделі жөндеу жұмыстары басталып кетті.

Материалдық техникалық базаны нығайту бағытында аудан мектептері 100% кең жолақты интернет желісіне қосылған. Сонымен қатар, бүгінгі күні мектептер 95% жаңа модификациялық физика, химия, биология пәндік кабинеттерімен жабдықталған.