GOV.KZ – Мемлекеттік органдардың цифрлық ресурстарының бірыңғай платформасы

Аудан әкімі Ерлан Төрәлиев Жалағаш кентіндегі Дәуімбай елді мекенінде салынып жатқан 16 пәтерлі тұрғын үйдің, Ақтерек жер учаскесіндегі 50 пәтерлі тұрғын үйдің және теміржол вокзалы ғимаратының құрылыс жұмыстарымен танысты.

«Құрылыс сапасын күнделікті бақылауда ұстаңыздар. Халық бұл үйлерді асыға күтіп отыр. Сондықтан, құрылыс барысында ешқандай кемшілікке жол берілмеуі тиіс. Әр нысан қатаң бақылауда болып, белгіленген мерзімнен кешіктірмей, ел игілігіне табыстауымыз керек», - деді аудан әкімі Е.Төрәлиев.

Сондай-ақ, аудан әкімі құрылыс материалдарының сапасына және олардың белгіленген талаптарға сәйкестігіне назар аударып, жұмыстардың белгіленген нормаларға сай жүргізілуін ескертті.

Кеше аудан әкімі Ерлан Төрәлиев Жалағаш кентінде салынып жатқан жаңа теміржол вокзалын аралап көріп, жүргізіліп жатқан жұмыстардың барысын бақылады.

Жобаның бас мердігері – «Р и А Сервис ЛТД» ЖШС.

Қазіргі таңда ғимараттың ішкі қабырғаларына әрлеу жұмыстары жүргізіліп, нысан аумағы жобаға сәйкес абаттандырылуда. Аудан әкімі құрылыс сапасын қатаң бақылауда ұстап, жұмыс қарқынын арттыруды тапсырды.

Сонымен қатар, жауапты сала басшыларына құрылыс жұмыстарын белгіленген мерзімде сапалы аяқтауды, вокзал аумағын талапқа сай абаттандырып, көркейту жұмыстарын толық аяқтауды тапсырды.

Жалағаш кентінің орталық алаңы аумағындағы бүлінген жерлер ретке келтіріліп, абаттандыру жұмыстары жүргізілді. Сонымен қатар, алаң аумағындағы бордюрлер әктеліп, тазалық пен көріктендіру жұмыстары атқарылды.

Қоғамдық орындар – баршаға ортақ мекен. Сондықтан айналамызға жанашырлықпен қарап, тазалық пен тәртіпті сақтауға үлес қосайық. Бір-бірімізге құрметпен қарап, ортақ ортаны күтіп ұстау – әр тұрғынның азаматтық жауапкершілігі екенін сезінейік!

Жан-жағымызды бүлдірмеуге тырысайық!

Жалағаш кентінің тазалығы мен көркеюіне үлес қосу мақсатында Жалағаш кенті әкімі аппараты мен «Жалағаш қызмет» мекемесінің ұжымдары сенбілік жұмыстарына белсене қатысты.

Сенбілікке Жалағаш кентінің әкімі Қайрат Жапбасбаев өзі бастап, тазалық жұмыстарына тікелей атсалысты. Кент әкімі белгіленген аумақта шөп шабу жұмыстарын жүргізіп, ұжымға үлгі көрсетті.

Игі іске жұмылған қос ұжым кент аумағын абаттандыруға және қоршаған ортаның тазалығын сақтауға өз үлестерін қосты.

1 қазан күні Қ.Қазантаев атындағы аудандық мәдениет үйінде  Халықаралық қарттар күніне орай аудан әкімі Ерлан Төрәлиевтің қатысуымен мерекелік салтанатты жиын өтті.

Жиында аудан әкімі ардагерлерді мерекемен құттықтап, олардың ел дамуына қосқан үлесі мен кейінгі ұрпаққа берер тағылымын атап өтті.

«Құрметті ардагерлер! Сіздерді 1 қазан – Халықаралық қарттар күні мерекесімен шын жүректен құттықтаймын! Сіздердің өмірден түйген тағылымдарыңыз бен елге сіңірген еңбектеріңіз әрдайым кейінгі ұрпаққа өнеге. Сіздер – зейнет жасында болсаңыздар да, ауданның қоғамдық-мәдени өміріне белсене араласып, жас ұрпаққа тағылымды тәрбие беріп келесіздер. Бұл – сіздердің қоғамдағы зор беделдеріңіздің, елімізге деген адал жанашырлықтарыңыздың айқын көрінісі. Мемлекет тарапынан ардагерлерге жасалып жатқан қамқорлық жылдан-жылға артып келеді. Ауданда ашылған «Руханият» орталығынан ардагерлер ұйымына арнайы кеңсе беріліп, ардагерлердің бас қосып, жастармен тағылымды кездесулер өткізуіне барлық мүмкіндік жасалды. Бүгінде сіздер осы мүмкіндікті тиімді пайдаланып, жастарға ақыл-кеңестеріңізді айтып, өмірлік тәжірибелеріңізбен бөлісіп келесіздер. Өмірлік тәжірибелеріңіз бен парасатты болмыстарыңыз – кейінгі буын үшін баға жетпес байлық. Сіздердің елге сіңірген еңбектеріңіз бен өнегелі жолдарыңыз әрдайым құрметке лайық. Әрдайым ұрпақтарыңыздың қуанышын көріп, елдің құрметіне бөленіп жүре беріңіздер!» – деді Е.Төрәлиев.

Мерекелік шара барысында аудан әкімі бір топ еңбек ардагерін «Жалағаш ауданының дамуына қосқан үлесі үшін» медалімен марапаттап, облыс әкімінің және аудан әкімінің мерекелік құттықтауларын табыстады.

Сондай-ақ, аудандық ардагерлер кеңесінің төрағасы Садық Алиев сөз сөйлеп, бірқатар ардагерге «Жалағаш ауданының құрметті ардагері» медалін табыстады.

Мерекелік шара аудан өнерпаздарының концерттік бағдарламасына ұласты.

Қ.Қазантаев атындағы аудандық мәдениет үйінде Ұстаздар күніне орай мерекелік салтанатты жиын өтті. Жиында аудан әкімінің міндетін атқарушы Ғани Сүлейменов аудан әкімінің атынан ұстаздарды кәсіби мерекесімен құттықтады.

«Ұстаз – жас ұрпаққа білім беріп қана қоймай, олардың тұлға болып қалыптасуына бағыт-бағдар беретін ардақты маман. Сіздердің еңбектеріңіз елдің ертеңі үшін маңызды. Ұстаз еңбегін бағалау, мәртебесін көтеру – басты міндеттердің бірі. Баршаңызды кәсіби мерекелеріңізбен құттықтаймын! Еңбектеріңізге табыс, шәкірттеріңізге биік жетістіктер тілеймін. Әрдайым абырой биігінен көріне беріңіздер!», – деді Ғани Сүлейменов.

Салтанатты жиында бір топ ардагер ұстаздар мен білім саласының үздік мамандары «Жалағаш ауданының дамуына қосқан үлесі үшін» медалімен, облыс әкімінің және аудан әкімінің Алғыс хаттарымен, облыстық білім басқармасы басшысының Құрмет грамотасымен және құттықтауымен марапатталды.

Мерекелік шара барысында аудан өнерпаздары ұстаздарға арнап ән шырқап, өнер көрсетті. Концерттік бағдарлама мерекелік жиынның мазмұнын толықтырып, ұстаздарға көтеріңкі көңіл күй сыйлады.

Аудан әкімі Ерлан Төрәлиевтің қатысуымен Дүниежүзілік тазалық күніне орай «Таза Қазақстан» экологиялық акциясы ұйымдастырылды.

Іс-шараға ауданның зиялы қауым өкілдері мен еңбек ардагерлері, мемлекеттік мекеме қызметкерлері, жастар, еріктілер және экологиялық бастамаларды қолдаушы белсенді азаматтар қатысты.

Тазалық жұмыстарына қатысушылар белгіленген аумақтарды қоқыстан тазартып, айналаны ретке келтіруге ат салысты.