«АЛТЫН КҮЗ – 2026» ОБЛЫСТЫҚ СПАРТАКИАДАСЫНЫҢ АШЫЛУ САЛТАНАТЫ ӨТТІ

10 қазан күні Жалағаш кентінің орталық стадионында «Алтын күз – 2026» ауыл спортшыларының ХХХІХ облыстық спартакиадасының ашылу салтанаты өтті. Салтанатты шараға аудан әкімі Ерлан Төрәлиев пен облыстық дене шынықтыру және спорт басқармасының басшысы Бақтияр Артаев қатысып, спортшыларды дүбірлі доданың басталуымен құттықтады.

Спорт ардагері Сұлтан Бекжанов спортшыларға ақ батасын берді. Салтанатты рәсім барысында спартакиада алауын аудан спортшылары жақты.

Ашылу салтанаты мерекелік концертке ұласты. Кеш қонақтары, жерлесіміз, белгілі әнші Мыңбай мен Руслан Табын сахна төрінде көпшілікке кеңінен танылған хит әндерін орындап, көрермендердің ыстық ықыласы мен зор қошеметіне бөленді.

Айта кетейік, «Алтын күз – 2026» облыстық спартакиадасы аясында 16 спорт түрінен жарыстар ұйымдастырылып, 7 ауданнан келген 1500 спортшы бақ сынауда.