Меню
Мемлекеттік тіл саясатының жүзеге асырылуы
Қызылорда облысында 2020 жылы мемлекеттік тіл саясатын жүзеге асыруға облыстық бюджеттен 82 млн. теңге қаржы бөлінді.
Тіл саясатын іске асыруда Қызылорда облысының тілдерді оқыту орталығы арқылы мемлекеттік мекеме, кәсіпорын, ұйым қызметкерлеріне, сондай-ақ жеке тұлғаларға мемлекеттік, орыс және ағылшын тілдерін оқыту курстары ұйымдастырылуда.
Есепті мерзімде тіл орталығы арқылы барлығы 2604 адам, оның ішінде 1126 адам мемлекеттік тілді, 596 адам орыс тілін, 882 адам ағылшын тілін оқыту курстарынан өтті.
Ономастика және көрнекі ақпаратты бақылау
Облыстық ономастика комиссиясында қаралып, облыс әкімдігі мен облыстық мәслихаттың бірлескен шешімімен ҚР Үкіметі жанындағы Республикалық ономастика комиссиясының қарауына бірқатар білім беру және мәдениет ұйымдарына атау беру туралы ұсыныстар жолданды. Нәтижесінде Республикалық ономастика комиссиясының оң қорытындысы мен тиісті министріліктердің келісім негізінде 2020 жылғы 2 наурызда облыстың 4 білім беру және мәдениет ұйымына атау беру туралы Қазақстан Республикасы Үкіметінің №92 қаулысы шықты.
«Қазақстан Республикасындағы тіл туралы» Заңның 21-бабы бойынша барлық маңдайшалар, хабарландырулар, прейскуранттар, баға көрсеткіштері және өзге де көрнекі ақпараттар міндетті түрде мемлекеттік тілде, қажет болған жағдайда орыстілінде және басқа тілдерде жазылуы тиіс. Мемлекеттік тілдегі мәтін толық, сауатты және бірінші кезекте орналастырылуы қажет. Көрнекі ақпарат талаптарын бұзған кәсіпкерлерге ҚР Әкімшілік құқық бұзушылық туралы Кодекстің 75-бабы бойынша:
Алғашқы рет талапты бұзған жағдайда — ескерту беріледі. Бір жыл ішінде қайталап бұзылса:
шағын кәсіпкерлік субъектілеріне – 5 АЕК,
орта кәсіпкерлік субъектілеріне – 10 АЕК,
ірі кәсіпкерлік субъектілеріне – 25 АЕК мөлшерінде айыппұл салынады.
Қазақстан Республикасының 1997 жылғы 11 шілдедегі №151 «Қазақстан Республикасындағы тіл туралы» Заңының 25-6-бабының 2-тармағына сәйкес мемлекеттік мекемелерді алдыңғы тексерулердің, есептілік пен мониторингінің мәліметтері, интернет-ресурстарын талдау нәтижелері, субъектіні мерзімді тексеру жүргізудің жартыжылдық жоспарына енгізуге негіз болады.