GOV.KZ – Мемлекеттік органдардың цифрлық ресурстарының бірыңғай платформасы

Облыс әкімі Мұрат Ергешбаевтың қатысуымен облыстық мәслихаттың кезектен тыс 37-ші сессиясы өтті. Оған облыс әкімінің орынбасарлары, құқық қорғау органдарының, басқармалар мен аумақтық департаменттердің басшылары қатысты. Аудан және қала әкімдері, мәслихат төрағалары онлайн байланыс арқылы қосылды.
Сессия басталмас бұрын қатысушылар Маңғыстау облысындағы қайғылы оқиға салдарынан қаза тапқан әскери қызметшілерді бір минут үнсіздікпен еске алды.
Жиынды облыстық мәслихат төрағасы Мұрат Тлеумбетов жүргізіп, күн тәртібінде 6 мәселе қаралды.
Атап айтқанда, 2026-2028 жылдарға арналған облыстық бюджет, облыс әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның дербес құрамын, тұрғынжай реновациялау бағдарламасын, облыс әкімдігі жанындағы cәулет-қала құрылысы кеңесінің құрамын бекіту, облыстық сайлау комиссиясының құрамын сайлау мәселелері талқыланды.
Аймақ басшысы өңірдің негізгі көрсеткіштеріне тоқталып өтті.
«Қаңтар-тамыз айларының қорытындысымен барлық макроэкономикалық көрсеткіштерде өсім қамтамасыз етіліп, аймағымыз республикада алдыңғы қатардан көрінді. Қолайлы инвестициялық климат қалыптасып, ірі инвестициялық жобалар жүзеге асырылуда. Биылға 789 млрд. 200 млн. теңге инвестиция тарту жоспарланды.
Жыл басында облыс бюджеті 705 млрд. 548 млн. теңге көлемінде бекітіліп, нақтылаудың нәтижесінде 811 млрд. 467 млн. теңгеге жетті. Бұл қаражат аймағымыздың ең өзекті деген мәселелерін шешуге, тұрғындардың өмір сүру сапасын жақсартуға, ауқымды инфрақұрылымдық жобаларға бағытталуда.
Мемлекет басшысының тапсырмасы аясында «КазАтомӨнеркәсіп» компаниясымен облыс аумағында әлеуметтік жобаларды жүзеге асыру жөніндегі меморандумға қол қойылды. Меморандумға сәйкес, Жаңақорғанның Ақжол ауылында 150 орындық клуб, Жаңақорған кентінде емхана және Шиелі ауданының Бәйтерек ауылында заманауи спорт кешені салынуда. Аталған жобаларға «КазАтомӨнеркәсіп» есебінен 1 млрд. 677 млн теңге бөлінуде», – деді Мұрат Нәлқожаұлы.
Күн тәртібіндегі мәселелер бойынша облыстық экономика және қаржы басқармасының басшысы С.Мырзабек, облыстық балалардың құқықтарын қорғау жөніндегі басқармасының басшысы Е.Бәкіров, облыстық құрылыс, сәулет және қала құрылысы басқармасының басшысы А.Әнуар, облыстық аумақтық сайлау комиссиясының мүшесі Б.Ідірісов, облыс әкімі аппаратының басшысы Ә.Мұхамедияров баяндама жасады.

Астанадағы Президент орталығында Премьер-министр Олжас Бектеновтің қатысуымен Еңбек күніне арналған «Еңбек – ел мұраты» атты республикалық форум өтті.
Еске салайық, елімізде Еңбек күні 2013 жылдан бері атаулы күндер қатарында. 
Бұл форум түрлі салада ел игілігіне адал қызмет етіп, өнегелі ісімен көпке үлгі болып жүрген еңбек адамдарын кеңінен насихаттауға бағытталады. 
Аталған шараға Сыр өңірінің делегациясы да қатысып, арнайы номинациялар бойынша марапаттарға ие болды.
Атап айтқанда, «Үздік еңбек әулеті» номинациясын қызылордалық Абдрахмановтар әулеті алды. Бұл әулеттің төрт буыны теміржол саласында еңбек етіп келеді, жалпы еңбек өтілі 318 жыл. Салаға сіңірген еңбек жоғары бағаланып, әр жылдары әулет мүшелері «Ленин», «Қызыл жұлдыз», «Еңбек даңқы» ордендеріне, түрлі деңгейдегі марапаттарға ие болған.
Бұдан бөлек, Мемлекет басшысының Жарлығымен қырық жылдан
астам «Жаңа жол» ЖШС механизаторы болып еңбек еткен Талғат Байымбетов, 31 жыл бойы «Шалқия Цинк ЛТД» ЖШС-ның тас қалаушысы Мырза Малкенов «Ерен еңбегі үшін» медалімен марапатталды.

Облыс әкімі Мұрат Ергешбаев Сыр өңіріне жұмыс сапарымен келген ҚР Экология және табиғи ресурстар министрі Әлібек Қуантыровпен бірге Қазалы ауданына барды. 
Сапар барысында Қазалы қаласындағы жақында іске қосылған орман тұқымбағының жұмысымен танысты. 
Аталған жоба Мемлекет басшысының орман қорын ұлғайту және экологиялық тұрақтылықты қамтамасыз ету жөніндегі тапсырмасына сәйкес Дүниежүзілік банктің қаржыландыруымен 440 млн теңгеге жүзеге асырылған. 
Аумағы 33,5 гектар тұқымбақта 16 арнайы техника бар. Қара сексеуіл, жапырақты және жеміс дақылдары, үйеңкі секілді ағаш түрлері өсіріліп, қорғаныш жасыл белдеу жасау жұмыстары ұйымдастырылуда. Қазір тұқымбақта 45 адам жұмыспен қамтылған. 
Бұдан кейін Қазалы қаласындағы республикалық орман селекциялық тұқым өсіру орталығының тұқымбағы таныстырылды. 
Жалпы ауданы 32 гектар тұқымбақтың 17 гектары орманмен қамтылған. Ал 15 гектары жайылымдық жер ретінде пайдаланылуда. Мұнда жылына 1-1,5 млн дана көшет өсіріледі. Сондай-ақ, таулы аймақтарға тән айлант, катальпа, туя секілді 10 түрлі ағаш көшеттері жерсіндіріліп, бес түрлі жеміс ағашы да өсірілуде. Арал теңізінің құрғаған табанына отырғызылатын сексеуіл көшеттері де осы жерде дайындалады. Биыл тұқымбақта сексеуіл көшетін егу жоспарланып отыр. Қазіргі уақытта мұнда 41 адам жұмыспен қамтылған. 

Бүгін аудан әкімдігінің мәжіліс залында аудандық мәслихаттың кезекті 62 сессиясы өтті. Жиынды аудандық мәслихаттың төрағасы Ғазиз Әліш ашып, жүргізіп отырды.

Сессияға аудан әкімі Алмасбек Есмаханов, Қызылорда облысының құрметті азаматы, «РЗА» АҚ-ның президенті Самұрат Имандосов, аудандық ардагерлер кеңесінің төрағасы Оразғали Бекбанов, Қазалы ауданының құрметті азаматы Қасқырбай Әлімбай, облыстық мәслихат депутаттары Ибайдулла Тілеп, Нұрлан Имандосов, аудан прокуроры Мадияр Бекпанов, аудандық полиция бөлімінің бастығы Нұрлан Ибраев, аудан әкімінің орынбасарлары, облыстық бағыныстағы мекеме басшылары, аудандық қоғамдық кеңестің мүшелері, білім, теміржол мекемелерінің басшылары, қоғамдық ұйымдардың жетекшілері, дербес бөлім басшылары мен қала, кент, ауылдық округ әкімдері қатысты.

Сессия отырысының күн тәртібіне енген мәселе аудан әкімінің өзіне жүктелген функциялар мен міндеттерін орындауы жөніндегі есебі болды.

Күн тәртібіндегі мәселе бойынша баяндама жасаған аудан әкімі Алмасбек Әбілқасымұлы жыл басынан бергі аудан экономикасының әр саласында жүзеге асырылған жұмыстар мен алдағы негізгі жоспарларға тоқталды.

Президентіміз Қасым-Жомарт Кемелұлы Тоқаевтың Сыр өңіріне деген айрықша қолдауының арқасында, аймағымызды 4 жылдан астам уақыт басқарған Қазақстан Республикасы Премьер министрінің бірінші орынбасары Нұрлыбек Машбекұлының қолдауымен, облыс әкімі Мұрат Нәлқожаұлының басшылығымен ауданымызда айтулы істер, жарқын жобалар жүзеге асуда. Бүгінде аудан экономикасының барлық саласында тұрақты өсім қалыптасып, даму көрсеткіштері ілгеріледі.

2026 жылға арналған аудан бюджетінің көлемі 13,6 млрд. теңге болып бекітіліп, бүгінгі күнге 18,9 млрд. теңгеге нақтыланды. Ауданның өз кірістерінің жоспары 4 млрд 269,0 млн. теңге болып бекітілді. Бүгінгі күнге жоспар 99,3 млн. теңгеге ұлғайтылып, 4 млрд. 362,0 млн. теңгеге нақтыланды. Ауданның әлеуметтік-экономикалық дамуында 2026 жылдың 7 айында оң тенденция сақталды. Өнеркәсіп өндірісі – 126,5, өңдеу өнеркәсібі – 129,9, сауда – 100,7, ауыл шаруашылығы – 104,3, негізгі капиталға тартылған инвестиция – 103,6, құрылыс жұмыстарының көлемі – 115,4, тұрғын үй құрылысы – 102,0 пайызға артты. Жыл басынан бері ауданда Қазалы теміржол вокзалы қайта жаңғыртудан өтіп, вокзал жанындағы теміржол үстінен өтетін жаяу жүргіншілерге арналған аспалы көпір қайта салынды. Бекарыстан би, Қожабақы ауыдлдары мен Әйтеке би кентінде заманауи жаңа спорт кешендері ел игілігіне пайдалануға берілді. Бүгінде ауданда халықтың әлеуметтік осал топтары үшін берілетін 50 пәтердің құрылысы жүргізілуде. Халықты сапалы инженерлік-инфрақұрылыммен қамту бойынша аудан халқы 100 пайы зтаза ауыз сумен қамтылды. Жанқожа батыр, Бекарыстан би, Майдакөл және Түктібаев ауылдарына көгілдір отын жеткізіліп, биыл жыл соңына дейін төрт ауыл көгілдір отынның қуанышына кенелетін болады. Бұдан бөлек, Жанкент, Бірлік, Қожабақы және Аранды елді мекендеріне магистралдық газ құбырын тарту жоспарлануда. Ақсуат ауылына АГРС станциясы салу және Ақсуат пен Байқожа елді мекендеріне ауылішілік газ құбырын тарту жобасы да жоспарымызда бар. Жоба құжаттары әзірленіп, мемлекеттік сараптама қорытындысы алынған. Жобаны қаржыландыру үшін бюджет көздері қарастырылуда. Елді мекендердегі электр желілерін қайта жаңғырту бойынша Қазалы қаласы, Қожабақы, Ү.Түктібаев ауылдарының электр желілерін қайта жаңғыртылса, алдағы уақытта Жалаңтөс батыр мен Қ.Пірімов ауылдарының электр желілері жаңғыртылатын болады. Бүгінгі таңда аудандағы ең ауқымды жобалардың бірі – Қарлан көпірінің құрылысыда қарқынды жүргізілуде. Әрине, мұнан бөлек білім, денсаулық сақтау, мәдениет, спорт, кәсіпкерлік, өнеркәсіп, ауылшаруашылығы және басқа да салалардың барлығында да көрсетілген қолдау мен елдің ауызбіршілігінің нәтижесінде ауқымды жұмыстар атқарылуда, - деді аудан әкімі.

Сессия отырысында аудандық мәслихат депуттаттары ауданда жыл басынан бері атқарылған жұмыстарға оң бағасын беріп, алдағы уақытта да осындай аудан халқының игілігіне бағытталған ауқымды жобалардың жүзеге асуына тілектестіктерін білдірді.

Басқосу соңында Алмасбек Әбілқасымұлы ел ішіндегі жасалып жатқан нәтижелі жұмыстар аудандық мәслихат депутаттарымен бірлесе атқарғандықтың нәтижесі екеніне тоқталып, алдағы уақытта да елімізде Президентіміздің бастамасымен жүзеге асқан реформаларды қолдауға, ауданның әлеуметтік-экономикалық дамуы бағытындағы жұмыстарды ауызбіршілікпен бірлесе атқаруға шақырды.

Бүгін «Достық үйінде» облыс әкімі Мұрат Ергешбаевтың қатысуымен Қызылорда облысы бойынша тексеру комиссиясының 15 жылдығына арналған салтанатты шара өтті.
Оған мемлекет және қоғам қайраткері Омархан Өксікбаев, Жоғары аудиторлық палатасы жоспарлау, сертификаттау және әдіснама департаменті директорының орынбасары Ақбаян Әлімбаева, еліміздің барлық өңірінен келген тексеру комиссияларының төрағалары, ардагерлер мен зиялы қауым өкілдері қатысты.
Аймақ басшысы мемлекеттік аудит саласының бюджет қаражатын тиімді әрі мақсатты жұмсалуын қамтамасыз етудегі рөлін атап өтті.
«Президентіміз Қасым-Жомарт Кемелұлы өз Жолдауында қаржы тәртібі мен бюджет қаражатының ашықтығы қоғам сенімінің негізі екенін айтып, қаражаттың тиімді әрі мақсатты жұмсалуын қатаң тапсырып келеді. Әрбір теңге халықтың игілігіне бағытталып, тұрақты бақылауда болуы тиіс.
Бүгінде мемлекеттік аудит органдары жазалаушы емес, бюджет қаражатын тиімді жоспарлауға ықпал етіп, тәуекелдерді алдын ала анықтап, әріптестік қызмет атқаруда. Қызылорда облысы бойынша тексеру комиссиясы өңірде мемлекеттік ресурстардың тиімді әрі мақсатты пайдаланылуына зор үлес қосып келеді.
Мерейлі мерекеге орай салада қызмет атқарған ардагерлер мен мамандарға шынайы алғысымызды білдіреміз. Баршаңызға мықты денсаулық, отбасыларыңызға амандық, қажымас қайрат тілеймін!» – деді облыс әкімі.
Шарада бірқатар азамат Қазақстан Республикасы Президентінің Алғысымен, Қызылорда облысының Құрмет грамотасымен, облыс әкімінің Алғыс хатымен және Мемлекеттік қызмет істері агенттігінің «Мемлекеттік қызмет ардагері» төсбелгісімен марапатталды.
Мемлекет және қоғам қайраткері Омархан Өксікбаев сөз сөйлеп, әріптестерін құттықтады.
Өңірде мемлекеттік аудитпен қамтылған қаржы көлемі 2025 жылы 2 трлн теңгеден асып, 2012 жылмен салыстырғанда 3 есе өсті. Тексеру комиссиясы заң бұзушылықтарды анықтаумен қатар, оның алдын алуға басымдық береді. Әдістемелік және тәжірибелік жұмыстардың нәтижесінде бюджеттік ұйымдардың қаржылық сауаттылығы артып, кемшіліктер азайған.
Тексеру комиссиясының 15 жылдығы – өңірдің қаржылық бақылау жүйесінің дамуындағы маңызды белес. Осы уақыт ішінде комиссия кәсібилік пен жауапкершіліктің жоғары үлгісін көрсетіп, ауқымды жұмыс атқарды.