Жыл басынан бері облыста ауыл шаруашылығы саласында 128,5 млрд. теңгенің өнімі өндірілді. Бұл өткен жылдың осы кезеңімен салыстырғанда 1,4 пайызға артық. Ал тамақ өнімдерін өңдеу көлемі 39,8 млрд. теңгені құрап, 23,2 пайызға ұлғайды.
Су тапшылығына байланысты егісті әртараптандыруға басымдық берілуде. Мәселен, өңірде алғаш рет перспективалы дақылдар қант құмайы 70 гектарға, соя 240 гектарға, жүгері дақылы 1 667 гектарға дейін ұлғайтылды. Бұған қоса, ылғал сақтағыш аквагельді пайдаланып егілген 80 гектар күздік бидайдың әр гектарынан 18 центнерден өнім алынды.
Жалпы, биыл облыста 184,2 мың гектар алқапқа егiс егілді. Оның ішінде, дәндi дақылдар 99,9 мың, майлы дақылдар 5,7 мың, мал азықтық дақылдар 61 мың, картоп, көкөнiс, бақша 17,6 мың гектарды құрайды. Ал негізгі дақыл күрiштің көлемі 89,5 мың гектар.