Павлодар облысы бойынша Ішкі мемлекеттік аудит департаментімен Екібастұз қаласының балабақшасында мемлекеттік аудит жүргізілген болатын.
Аудит барысында 2022 жылдың маусым айында балабақша есепшісі жеке карт – шотына 17,0 млн теңгеге жуық қаражатты негізсіз аударғандығы анықталды (бюджеттік қаражатты ұрлау).
Бухгалтердің түсініктемелеріне сүйенсек, 2022 жылдың 14 маусымында бақша есепшісі әлеуметтік желіде Мұхтар Жәкішевтің платформасында ақша табу туралы хабарландыруды көріп, содан кейін сілтеме бойынша оған компания өкілі хабарласқан.
Әңгімелесу барысында ол есепшіге табыс табу үшін белгілі бір соманы аударуды көндірді, содан кейін бақша қызметкері ақшаны компания өкілінің есепшотына аударады.
Есепшінің карт-шотына аударылған бұл қаражат балабақша қызметкерлерінің еңбегіне ақы төлеуге, сондай-ақ сауықтыру жәрдемақыларына, салықтарға, коммуналдық төлемдерге және т.б. арналған болатын.
Жүргізілген аудит жөніндегі материалдар құқық қорғау органдарына жолданды.
Павлодар облысы Екібастұз қалалық сотының үкімімен балабақша есепшісіне 5 (бес) жыл мерзімге бухгалтерлік қызметпен айналысу құқығынан айыра отырып, 6 (алты) жыл мерзімге бас бостандығынан айыру жазасы тағайындалды, ҚК-нің 63-бабының негізінде тағайындалған жаза шартты деп танылды.
Үкім заңды күшіне енді.
Павлодар облысы бойынша Ішкі мемлекеттік аудит департаменті