Камералдық бақылау мемлекеттік сатып алу саласындағы ашықтық пен заңдылықты қамтамасыз етудің негізгі құралдарының бірі болып табылады. Ұлытау облысы бойынша Ішкі мемлекеттік аудит департаменті камералдық бақылауды объектілерге бармай-ақ, мемлекеттік сатып алу веб-порталында орналастырылған деректер негізінде жүзеге асырады.
Камералдық бақылаудың негізгі мақсаты – бұзушылықтарды уақтылы анықтау және олардың алдын алу, сондай-ақ жауапкершілік шараларын қолданғанға дейін тапсырыс берушілерге анықталған бұзушылықтарды өз бетінше жоюға мүмкіндік беру.
2026 жылдың тоғыз айында Камералдық бақылау бөлімі жалпы сомасы 232,17 млрд теңгені құрайтын 6 684 лотты бақылаумен қамтыды. Нәтижесінде 26,61 млрд теңге сомасындағы 805 лот бойынша бұзушылықтар анықталды. Анықталған фактілер бойынша тиісті хабарламалар жолданып, олардың 15-і белгіленген мерзімде орындалмаған. Жауапты тұлғалар әкімшілік жауапкершілікке тартылды.
Мемлекеттік сатып алу тәсілдері бойынша бұзушылықтар келесідей бөлінді: 141 хабарлама – шартты тікелей жасасу арқылы бір көзден алу тәсілі бойынша, 370 хабарлама – баға ұсыныстарын сұрату тәсілі бойынша және 294 хабарлама – ашық конкурс тәсілі бойынша.
Жиі кездесетін бұзушылықтардың қатарында бір көзден алу тәсілін негізсіз қолдану, баға ұсыныстарын сұрату кезінде тауар белгілерін көрсету, техникалық ерекшеліктердің мемлекеттік тілде ұсынылмауы, сондай-ақ сатып алынатын тауарларға қойылатын стандарттардың көрсетілмеуі бар.
Бұзушылықтардың алдын алу мақсатында Департамент тапсырыс берушілер мен мемлекеттік сатып алуды ұйымдастырушылар арасында заңнамадағы өзгерістер бойынша тұрақты түрде түсіндіру жұмыстарын жүргізеді.
Осылайша, камералдық бақылау бұзушылықтарды анықтауға ғана емес, олардың алдын алуға, тапсырыс берушілердің жауапкершілігін арттыруға және мемлекеттік сатып алу жүйесінің ашықтығын нығайтуға бағытталған.