2026 жылдың үшінші тоқсанында Ұлытау облысы бойынша Ішкі мемлекеттік аудит департаменті бюджет қаражатының ашық әрі тиімді жұмсалуын бақылауға бағытталған жұмыстарын күшейтті.
Департамент қаржылық операцияларды жедел бақылауға және бюджет қаражатын тиімсіз немесе мақсатсыз пайдалану тәуекелдерін ерте анықтауға мүмкіндік беретін «Онлайн-бюджеттік мониторинг» ақпараттық жүйесін белсенді қолдануда.
Мониторинг нәтижесінде бірқатар салада күдікті төлемдер анықталды. Білім беру саласында жалпы сомасы 1,07 млрд теңгеге 2138 хабарлама, денсаулық сақтау саласында 15,1 млн теңгеге 53 хабарлама, ал мәдениет және спорт саласында 69,8 млн теңгеге 386 хабарлама жіберілді. Соңғы бағыт бойынша төлемдер қазіргі уақытта зерделенуде.
Жүргізілген жұмыстың нақты нәтижесі де бар. Бүгінгі күнге дейін аудит шараларының қорытындысы бойынша бюджетке 23,5 млн теңге қайтарылды.
Бұл көрсеткіш бюджет қаражатын бақылаудың тек бұзушылықтарды анықтаумен шектелмей, мемлекет қазынасына қаражатты қайтаруға және қаржылық тәртіпті күшейтуге бағытталғанын көрсетеді.