Ұлытау облысы бойынша ішкі мемлекеттік аудит департаменті «Әлеуметтік медициналық сақтандыру қоры» КЕАҚ-ның облыстық филиалына жоспардан тыс аудит жүргізді. Тексеру 2023 жылғы 1 қаңтардан 2026 жылғы 31 наурызға дейінгі кезеңді қамтып, 13,65 млрд теңге қаражаттың жұмсалуы зерделенді.
Аудит барысында медициналық қызметтерді көрсету мен есепке алу, ақпараттық жүйелердегі деректердің дұрыстығы және сақтандыру қаражатын пайдалану бойынша бірқатар бұзушылық анықталды.
Атап айтқанда, «Жаңаарқа ауданының көпбейінді орталық аудандық ауруханасы» мен «Сәтбаев қаласының ауруханасы» қаражатты банктік депозиттерге орналастырып, 92,7 млн теңге депозиттік кіріс алған.
Сондай-ақ ақпараттық жүйелерде қайтыс болған азаматтарға, елден тыс жүрген адамдарға қызмет көрсету, медициналық қызметтердің қайталануы және бір пациенттің бір уақытта бірнеше стационарда емделуі сияқты фактілер анықталды.
Бұдан бөлек, жекелеген медициналық ұйымдардың лицензиялық талаптарды сақтамағаны және іс жүзінде көрсетілмеген қызметтер үшін төлем жасалғаны белгіленді.
Аудит қорытындысы бойынша анықталған бұзушылықтарды жою, негізсіз төленген қаражатты өтеу және медициналық сақтандыру қаражатын пайдалануға бақылауды күшейту жөнінде тиісті шаралар қабылданады.