Батыс Қазақстан облысы бойынша Ішкі мемлекеттік аудит департаменті 2024–2025 жылдары азаматтардың тұрғылықты елді мекенінен тыс жерлерде емделуге баруына арналған тегін жол жүруді қамтамасыз етуге бөлінген бюджет қаражатының пайдаланылуына қатысты «Батыс Қазақстан облысының денсаулық сақтау басқармасы» мемлекеттік мекемесінде мемлекеттік аудит жүргізді.
Тексеру барысында өтемақы төлемдерінің бірқатары азаматтардың жол жүруі мен пациенттерді алып жүру фактісін растамайтын құжаттар негізінде төленгені анықталды. Аудит нәтижесінде жол жүру күндерінің емделу мерзімдеріне сәйкес келмеуі, сондай-ақ бірдей шығындардың қайталанып өтелу фактілері анықталды.
Сонымен қатар өтемақы алушылардың алған қаражатын Денсаулық сақтау басқармасының лауазымды тұлғасының банк шотына аудару фактілері анықталды. Өтемақы алған жекелеген азаматтардың жазбаша түсініктемелеріне сәйкес, олар іс жүзінде сапарға шықпаған, ал ұсынылған жол жүру құжаттары формальды түрде рәсімделген.
Аудит қорытындысы бойынша жалпы сомасы 6,3 млн теңге көлемінде бюджет қаражатының негізсіз жұмсалғаны анықталды.