Жүйе сигналы – аудит – нәтиже.
Ішкі мемлекеттік аудит комитетінің «Онлайн бюджеттік мониторинг» модулі ірі бюджеттік төлемдер бойынша тәуекелді анықтағаннан кейін, Алматы қаласы үшін қоғамдық көлікті сатып алуды тексеру дәл осылай басталды.
Тәуекелдерді талдау негізінде Алматы қаласы бойынша Ішкі мемлекеттік аудит департаменті жоспардан тыс мемлекеттік аудит жүргізді.
Тексеріс барысында 2025 жылдың соңында қоғандық көлікті сатып алу үшін бөлінген бюджет қаражатының жалпы сомасы 50 млрд теңгеден асқаны анықталды.
Бұл ретте, құны 33 млрд теңгеден асатын ақысы төленген автобустардың айтарлықтай бөлігі осы уақытқа дейін Алматыда пайдаланылмай, Саран қаласындағы жеткізушінің аумағында тұруын жалғастыруда.
Заңды сұрақ туындайды: егер көлік Алматы тұрғындары үшін сатып алынса, толық төлем жасалғаннан кейін бірнеше ай өтсе де, ол неліктен қалалық бағыттарға шықпады?
Мемлекеттік аудит нәтижелері бойынша Алматы қаласының Жол қозғалысын дамыту және қоғамдық көлік басқармасына анықталған бұзушылықтарды жою және оларға жол берген тұлғалардың жауапкершілігін қарау туралы нұсқама енгізілді.
«Бүгінгі таңда мемлекеттік аудит тәуекелге бағытталған тәсілге көбірек негізделуде. Бұл бақылау іс-шараларын ықтимал бұзушылық белгілері бар бюджеттік операцияларға шоғырландыруға және оларды жою бойынша уақтылы шаралар қабылдауға мүмкіндік береді. Мұндай тәсіл мемлекеттік аудиттің сапасын арттырып қана қоймай, бюджет қаражатын пайдалану кезінде бұзушылықтардың алдын алуға ықпал етеді», – деп атап өтті Алматы қаласы бойынша Ішкі мемлекеттік аудит департаментінің басшысы Алмас Кавкитаев.