Ақтөбе облысы бойынша Ішкі мемлекеттік аудит Департаменті 2025 жылдан бастап мемлекеттік қаражаттың мақсатты әрі тиімді пайдаланылуын қамтамасыз ету мақсатында онлайн бюджеттік мониторинг жүйесін тұрақты негізде қолданды. Аталған цифрлық жүйе бюджеттік шығыстарды нақты уақыт режимінде бақылауға, тәуекелдерді ерте кезеңде анықтауға және қаржылық тәртіпті нығайтуға мүмкіндік берді.
Онлайн бюджеттік мониторинг – бюджеттік қаражаттың қозғалысын автоматтандырылған түрде талдайтын заманауи цифрлық платформа. Жүйе арқылы орталық мемлекеттік органдар мен жергілікті атқарушы органдардың қаржы игеруі бойынша деректер жинақталып, талданып, тәуекел белгілері анықталған жағдайда уәкілетті органдарға жедел хабарламалар жолданады. Бұл өз кезегінде қаржылық бұзушылықтардың алдын алуға және бюджет қаражатын тиімді басқаруға ықпал етеді.
Онлайн бюджеттік мониторинг жүйесі қазіргі таңда мемлекеттік қаржы саласында ашықтықты арттыруға, қаржылық тәртіпті нығайтуға және бюджет қаражатының тиімді пайдаланылуын қамтамасыз етуге бағытталған маңызды құрал ретінде өз тиімділігін дәлелдеді.
2026 жылдың басынан Департамент «Онлайн бюджеттік мониторинг» жүйесі арқылы білім, денсаулық сақтау, мәдениет және спорт салалары бойынша 20387 тәуекел қаралып, жалпы сомасы 6265212,8 мың теңгені құрайтын 341 хабарлама жолданды.
"Ақтөбе облысының білім басқармасы Шалқар ауданының білім бөлімі" КММ-де 2026 жылдың қаңтар айында мұғалімдерге барлығы 214,1 мың тенгеге уақытша еңбекке жарамсыздық бойынша жәрдемақы шекті мөлшерден артық төленген. Сондай-ақ 2026 жылдың наурыз айында кітапханашыға уақытша болмаған жұмыскердің міндеттерін қоса атқару үшін лауазымдық айлығы 100% мөлшерінде есептелініп, 28,4 мың тенге еңбекақы артық төленген және шаруашылық меңгерушісіне 246,7 мың тенгеге демалыс ақысы артық төленген.
Тиісті шаралар қабылданып, жалпы сомасы 489,2 мың теңге мекеме шотына толығымен қайтарылды. Тексеру нәтижелері бойынша білім бөлімінің есепшісі «ескерту» түріндегі тәртіптік жауапкершілікке тартылды.
«Ақтөбе қаласының білім бөлімі» мемлекеттік мекемесінің «Әл-Фараби атындағы № 21 мамандандырылған гимназия» КММ-де 2026 жылдың ақпан, наурыз, сәуір айларында есепшіге 244,7 мың тенгеге еңбекақының негізсіз артық аударылғаны анықталды, артық аудырылған сома мекеме шотына қалпына келтірілді.
Тексеру нәтижелері бойынша мектептің бас есепшісі «ескерту» түріндегі тәртіптік жауапкершілікке тартылды.