Қазақстан Республикасы Қаржы министрлігі Ішкі мемлекеттік аудит комитетінің Астана қаласы бойынша Ішкі мемлекеттік аудит департаменті 2026 жылдың 1 жартыжылдығындағы азаматтар мен заңды тұлғалардың өтініштерін қарау жұмысының қорытындыларын шығарды.
Есепті кезеңде Департаментке барлығы 1 319 өтініш келіп түсті. Оның ішінде 931 – арыз, 283 – шағым, 9 – ұсыныс және 96 – өзге де өтініштер (хабарламалар, сұрау салулар, пікірлер).
Жалпы келіп түскен өтініштердің 1 003-і Департаменттің құзыреті шегінде қаралды. Қарау нәтижесінде 9 өтініш бойынша өтініш берушілердің уәждері өз растауын тапты. Аталған фактілер бойынша аудиторлық іс-шаралар жүргізіліп, олардың барысында заңнама талаптарының сақталуы және бюджет қаражатының мақсатты пайдаланылуы мәселелері тексерілді.
Сонымен қатар, 316 өтініш одан әрі қарау және тиісті шешім қабылдау үшін құзыреті бойынша тиісті мемлекеттік органдарға жолданды.
Келіп түскен өтініштерді талдау олардың басым бөлігі Қазақстан Республикасының мемлекеттік сатып алу туралы заңнамасының сақталуына, оның ішінде мемлекеттік сатып алудың күшін жою және камералдық бақылау жүргізу мәселелеріне қатысты екенін көрсетті. Сондай-ақ өтініштердің едәуір бөлігі білім беру саласы қызметкерлерінің еңбегіне ақы төлеу мәселелеріне қатысты болды.
Өтініштерді жедел әрі сапалы қарауды, сондай-ақ уақтылы және негізді шешімдер қабылдауды қамтамасыз ету мақсатында Департамент өтініш берген кезде Қазақстан Республикасы заңнамасының талаптарын сақтаудың, оның ішінде өтініштің түрін дұрыс айқындаудың және баяндалған уәждерді растайтын құжаттарды қоса берудің маңыздылығын еске салады.