2026 жылдың бірінші жартыжылдығында Мемлекеттік ішкі аудит департаменті 25 аудиторлық іс-шара өткізді. Оның қорытындысы бойынша жалпы сомасы 21,7 млрд теңгені құрайтын бұзушылықтар анықталды, оның ішінде қаржылық бұзушылықтар көлемі 14,5 млрд теңгені құрады.
Қаржылық бұзушылықтардың басым бөлігі бухгалтерлік есепті жүргізу және қаржылық есептілікті жасау кезінде анықталды. Сонымен қатар, бұзушылықтар құрылыс, тұрғын үй-коммуналдық шаруашылық және жолаушылар көлігі салаларында да жиі кездеседі. Ең көп анықталған бұзушылықтардың қатарында нақты орындалмаған жұмыстарға ақы төлеу, сондай-ақ техникалық ерекшелік талаптарына сәйкес келмейтін тауарларды сатып алу фактілері бар.
Бірінші жартыжылдықта облыстың Ауыл шаруашылығы басқармасы тарапынан селекциялық және асыл тұқымды жұмыстарды жүргізуге 588,1 млн теңге көлемінде субсидияның негізсіз аударылғаны анықталды. Аталған қаражат бюджетке қайтарылуға жатады. Аталған фактілер бойынша аудит материалдары процестік шешім қабылдау үшін прокуратура органдарына жолданды.
Қабылданған шаралардың нәтижесінде 13,5 млрд теңге көлеміндегі қаржылық бұзушылықтар толық көлемде жойылды. Аудит объектілерінің 34 лауазымды тұлғасы тәртіптік жауапкершілікке тартылды. Келтірілген залалды өтеу және қаржылық бұзушылықтар бойынша қаражатты өндіріп алу жұмыстары тұрақты негізде жалғасуда.
Сонымен қатар, Қазақстан Республикасының Әкімшілік құқық бұзушылық туралы кодексінің талаптарын бұзу фактілері бойынша Департамент 67 әкімшілік іс қозғады. Олардың нәтижесінде жалпы сомасы 8,1 млн теңгеге әкімшілік айыппұлдар салынды, олардың барлығы толық көлемде өндірілді.