Павлодар облысы бойынша Ішкі мемлекеттік аудит Департаменті «Павлодар облысының ветеринария станциясы» ШЖҚ МКК -да ветеринариялық іс-шараларды жүргізуге бөлінген бюджет қаражатын пайдалану сұрағы бойынша аудиторлық іс-шарасын аяқтады.
Тексеру нәтижесінде 1,7 млн. теңге көлемінде бюджет қаражатының негізсіз жұмсалғаны, сондай-ақ ветеринариялық іс-шараларды ұйымдастыру және құжаттық ресімдеу кезінде бұзышулықтарға жол берілгені анықталды.
Негізгі бұзушылықтардың бірі – 4 994 бас ірі қара малға қарсы вакцинаның қайта егілгені болды. Вакцинаны қолдану жөніндегі нұсқаулыққа сәйкес вакцинадан кейінгі иммунитет 12 ай бойы сақталады, сондықтан осы мерзім ішінде қайта вакцинациялауға жол берілмейді. Соған қарамастан аталған ветеринариялық іс-шаралар жүргізіліп, бюджет қаражаты есебінен төленген, бұл 1,7 млн. теңге көлеміндегі негізсіз шығындарға әкелген.
Сонымен қатар аудит барысында ірі қара малды аусылға қарсы вакцинациялау бойынша 7334 жағдайдың формальды түрде рәсімделгені анықталды. Аталған жағдайлар тиісті негіздерсіз құжаттарға енгізілген, бұл ветеринариялық іс-шараларды жоспарлау мен есепке алу бойынша бақылаудың жеткіліксіз болғанын көрсетеді.
Сондай-ақ бастапқы есепке алу құжаттарын ресімдеу кезінде де бұзушылықтар анықталды. Кейбір жағдайларда құжаттарды мал иелерінің қолдарының орнына басқа адамдар қол қойған, бұл бастапқы есепке алу құжаттарын рәсімдеудің белгіленген тәртібінің сақталмағаның көрсетеді.
Аудит нәтижесінде негізсіз жұмсалған 1,7 млн. теңге көлеміндегі бюджет қаражаты бюджетке толық көлемде өтелді. Сонымен қатар анықталған бұзушылықтар бойынша кінәлі лауазымды тұлғалар қолданыстағы заңнамаға мәйкес тәртіптік жауапкершілікке тартылды.