Ұлытау облысында мемлекеттік қаржыны жымқыруға қатысты кезекті заң бұзушылық фактісі бойынша сот үкімі шықты. «Ұлытау облысының мемлекеттік архиві» КММ-нің бас есепшісінің міндетін атқарушы бюджет қаражатын аса ірі көлемде жымқырғаны үшін кінәлі деп танылды.
Сот материалдарына сәйкес, ол 2023 жылғы қаңтар мен 2025 жылғы мамыр аралығында мекеме басшыларының электрондық цифрлық қолтаңбаларын (ЭЦҚ) заңсыз пайдаланып келген. Осы ЭЦҚ кілттері арқылы архивтің бюджеттік есепшотынан өзінің жеке банктік шотына бірнеше мәрте заңсыз ақша аударып отырған. Нәтижесінде мемлекетке келтірілген шығын көлемі 23 миллион 828 мың 36 теңгені құрады.
Сот талқылауы барысында сотталушы келтірілген шығынның 8 миллион 444 мың 545 теңгесін мемлекетке өз еркімен қайтарды. Сонымен қатар қалған берешекті өтеуге міндеттенді. Жәбірленуші тарап – Ұлытау облысының мәдениет басқармасы соттан қалған 15,3 миллион теңгені сотталушыдан өндіріп беруді сұрады.
Сот үкімімен айыпталушы Қазақстан Республикасы Қылмыстық кодексінің 189-бабының 4-бөлігі бойынша кінәлі деп танылып, 7 жыл 6 ай мерзімге бас бостандығынан айырылды. Бұдан бөлек, оған 5 жыл бойы есепшілік қызметпен айналысу құқығынан айыру түріндегі қосымша жаза тағайындалды.
Аталған аса ірі көлемдегі бюджет қаражатын жымқыру дерегі Ұлытау облысы бойынша Ішкі мемлекеттік аудит департаменті жүргізген онлайн-бюджеттік мониторинг пен талдау жұмыстарының нәтижесінде анықталды. Бұл жағдай мемлекеттік қаржының ашықтығы мен тиімді жұмсалуын қамтамасыз етуде цифрлық бақылау тетіктерінің маңызын тағы бір мәрте көрсетті.