Ұлытау облысы бойынша Ішкі мемлекеттік аудит департаменті «Ұлытау облысының дене шынықтыру және спорт басқармасы» мемлекеттік мекемесінің қаржылық есептілігіне жүргізілген мемлекеттік аудиттің қорытындыларын шығарды.
Тексеру барысында бухгалтерлік есепті жүргізу және қаржылық есептілікті жасау кезінде бірқатар бұзушылықтар анықталды. Атап айтқанда, жалпы сомасы 4 329,5 мың теңгені құрайтын дебиторлық және кредиторлық берешектердің бухгалтерлік есепте көрсетілмегені белгілі болды. Сонымен қатар, мемлекеттік мекемелерде бухгалтерлік есеп жүргізу қағидаларының талаптарын сақтамау салдарынан негізгі құралдардың амортизациясы 38,7 мың теңге сомасына дұрыс есептелмеген.
Бұдан бөлек, мемлекеттік аудит барысында жалпы сомасы 29 504,8 мың теңгені құрайтын рәсімдік бұзушылықтар анықталды.
Аудиторлық іс-шаралар барысында жалпы сомасы 4 368,2 мың теңгені құрайтын қаржылық бұзушылықтар қалпына келтіріліп, толық көлемде жойылды.
Қаржылық есептілікті бұрмалап жасағаны үшін басқармаға қарасты ұйымдардың екі бас бухгалтері әкімшілік жауапкершілікке тартылды. Оларға қатысты әкімшілік құқық бұзушылық туралы хаттамалар толтырылып, жалпы сомасы 491,5 мың теңге көлемінде әкімшілік айыппұл салынды. Айыппұлдар толық көлемде өндірілді.
Аудит нәтижелері мемлекеттік мекемелерде қаржылық есептілікті қалыптастыру кезінде бухгалтерлік есеп талаптарын қатаң сақтаудың және ішкі қаржылық бақылауды күшейтудің маңыздылығын тағы бір мәрте көрсетті.