Ұлытау облысы бойынша Ішкі мемлекеттік аудит департаменті «Ұлытау облысының мәдениет, тілдерді дамыту және архив ісі басқармасы» мемлекеттік мекемесінің қаржылық есептілігіне жүргізілген мемлекеттік аудиттің қорытындыларын шығарды.
Жүргізілген тексеру барысында бухгалтерлік есепті жүргізу және қаржылық есептілікті жасау кезінде бірқатар бұзушылықтар анықталды. Атап айтқанда, аудиторлар 61,0 мың теңге сомасындағы дебиторлық берешектің бухгалтерлік есепте көрсетілмегенін анықтады. Сонымен қатар, мемлекеттік мекемелерде бухгалтерлік есеп жүргізу қағидаларының талаптарын сақтамау салдарынан негізгі құралдардың амортизациясы 1 917,7 мың теңге сомасына дұрыс есептелмеген.
Бұдан бөлек, мемлекеттік аудит барысында жалпы сомасы 1 594,8 мың теңгені құрайтын рәсімдік бұзушылықтар анықталды.
Сонымен бірге, аудит жүргізу барысында жалпы сомасы 1 978,7 мың теңге болатын қаржылық бұзушылықтар қалпына келтіріліп, толық көлемде жойылды.
Қаржылық есептілікті бұрмалап жасағаны үшін басқармаға қарасты ұйымдардың бірінің бас бухгалтеріне қатысты әкімшілік ықпал ету шаралары қолданылды. Лауазымды тұлғаға қатысты әкімшілік құқық бұзушылық туралы хаттама толтырылып, 216,3 мың теңге мөлшерінде әкімшілік айыппұл салынды. Айыппұл сомасы толық көлемде өндірілді.