Түркістан облысы бойынша Ішкі мемлекеттік аудит департаменті 2026 жылғы 2 наурызда Түркістан облысының цифрландыру, мемлекеттік қызметтер көрсету және архивтер басқармасының «Қазығұрт аудандық мемлекеттік архиві» коммуналдық мемлекеттік мекемесіне аудиторлық іс-шара жүргізді.
Аудит нәтижесінде мемлекеттік сатып алу және бюджет қаражатын пайдалану саласындағы талаптардың сақталуына тексеру жүргізу барысында жалпы сомасы 180 000,0 мың теңге көлемінде қаржылық бұзушылықтар анықталды. Атап айтқанда, ғимаратты сатып алу кезінде техникалық ерекшелікте көрсетілген тауарлардың сәйкестігін растайтын құжаттардың жеткіліксіздігі және рәсімдердің толық орындалмауы фактілері тіркелді.
Сонымен қатар, Түркістан облысы, Қазығұрт ауданы, Қазығұрт ауылы орталық көшесінде орналасқан ғимаратты сатып алу рәсімдері барысында мемлекеттік мекеме тарапынан қабылданған құжаттар мен төлем шоттарының негізділігі мен дұрыстығын қамтамасыз ету талаптары сақталмағаны анықталды. Бұл өз кезегінде бюджет қаражатының жұмсалуында белгіленген тәртіптердің бұзылуына алып келген.
Аудиторлық іс-шара қорытындысы бойынша анықталған бұзушылықтарды жою және бюджет қаражатын қалпына келтіру бойынша тиісті нұсқама аудит объектісіне жолданды.
Түркістан облысы бойынша Ішкі мемлекеттік аудит департаменті бюджет қаражатының заңды, тиімді және мақсатты пайдаланылуын қамтамасыз ету бағытындағы бақылау жұмыстарын жалғастыруда.