Аудит нәтижесінде «Яссы-Несие» кредиттік серіктестігі арқылы жеке кәсіпкер «Нурдалет»-ке берілген 40 800,0 мың теңге көлеміндегі несиені субсидиялау кезінде белгіленген талаптардың сақталмағаны белгілі болды.
Тексеру барысында қаражаттың мақсатты пайдаланылуы, қарыз алушының міндеттемелерді орындау жағдайы және субсидия беру шарттары толық көлемде ескерілмегені анықталды. Соның салдарынан уәкілетті комиссия тарапынан тиісті талаптарға сай келмейтін шешім қабылданып, нәтижесінде «Яссы Несие» КС» ЖШС-ның есепшотына 7 646,6 мың теңге субсидия қаражаты негізсіз аударылған.
Мамандардың айтуынша, мұндай жағдайлар қаржылық шешімдер қабылдау кезінде бақылаудың жеткіліксіздігін және құжаттарды жан-жақты тексермеу салдарын көрсетеді.
Қазіргі уақытта анықталған бұзушылықтарды жою және бюджет қаражатын қалпына келтіру бағытында тиісті жұмыстар жүргізілуде. Сонымен қатар, жауапты тұлғалардың әрекеттеріне құқықтық баға беру мәселесі қарастырылуда.
Түркістан облысы бойынша Ішкі мемлекеттік аудит департаменті бюджет қаражатының заңды, тиімді және мақсатты пайдаланылуын қамтамасыз ету бағытындағы бақылау жұмыстарын жүйелі түрде жалғастыруда.