Түркістан облысы бойынша Ішкі мемлекеттік аудит департаменті «Түркістан облысының ауыл шаруашылық басқармасы» мемлекеттік мекемесіне жүргізілген аудиторлық іс-шара барысында бюджет қаражатының жоспарлануы мен пайдаланылуына қатысты бірқатар қаржылық бұзушылықтарды анықтады.
Аудит нәтижесінде 25 шаруа қожалығы мен кәсіпкерлік субъектілеріне жалпы сомасы 147 635,5 мың теңге көлемінде субсидиялар негізсіз төленгені белгілі болды.
Тексеру барысында бюджет қаражатын игеру кезінде тиісті талаптардың толық сақталмауы салдарынан қаржылық тәртіптің бұзылғаны анықталды. Атап айтқанда, субсидиялау рәсімдерінде құжаттардың толықтығы мен дұрыстығына жеткілікті бақылау жүргізілмеген, сондай-ақ қаржыландыру шешімдерін қабылдау кезінде деректерді нақты тексеру тетіктері толық деңгейде қолданылмаған.Соның нәтижесінде бірқатар шаруашылық субъектілеріне заңнама талаптарына сәйкес келмейтін негізде бюджет қаражаты аударылған.
Департамент мамандары мұндай кемшіліктер бюджеттік жоспарлау мен бақылау жүйесіндегі әлсіз тұстарды көрсететінін атап өтіп, анықталған бұзушылықтарды жою және жауапты тұлғалардың әрекеттеріне тиісті құқықтық баға беру бойынша жұмыстар жүргізілуде екенін жеткізді.
Сонымен қатар, алдағы уақытта мұндай жағдайлардың алдын алу мақсатында ішкі бақылау тетіктерін күшейту, құжат айналымын жетілдіру және субсидиялау үдерістерінің ашықтығын арттыру қажеттігі баса айтылды.
Түркістан облысы бойынша Ішкі мемлекеттік аудит департаменті бюджет қаражатының тиімді әрі мақсатты пайдаланылуын қамтамасыз ету бағытындағы бақылау жұмыстарын жүйелі түрде жалғастыра беретін болады.