Түркістан облысы бойынша Ішкі мемлекеттік аудит департаменті: Ауыл шаруашылығы саласында 863 462,8 мың теңге көлемінде бұзушылық анықталды
Түркістан облысы бойынша Ішкі мемлекеттік аудит департаменті «Түркістан облысының ауыл шаруашылық басқармасы» мемлекеттік мекемесіне аудиторлық тексеру жүргізді. Аудит барысында асыл тұқымды мал шаруашылығын субсидиялау бағытындағы қаржылық операциялар мен құжаттар зерделенді.
Тексеру нәтижесінде бірқатар өнім берушілер тарапынан асыл тұқымды бұқаларды жеткізуге қатысты сәйкессіздіктер анықталды. Басқармадан алынған мәліметтер мен ветеринария саласы мамандарының анықтамаларына сәйкес, «Kaz Meat Kordai» ЖШС-нен бөлек, «JS-Бірлік» ЖШС және «БАЙ-НҰР» шаруа қожалығы жеткізуі тиіс болған асыл тұқымды бұқалардың Түркістан облысының кейбір аудандарына мүлдем келмегені расталған.
Сонымен қатар, кейбір аудандардың ветеринария мамандары асыл тұқымды бұқалардың нақты жеткізілгенін айтқанымен, тиісті құжаттардың рәсімделмегені белгілі болды. Бұдан бөлек, ақпараттық жүйе деректеріне сәйкес 2020–2021 жылдары аталған шаруашылық субъектілері бойынша асыл тұқымды бұқалардың кірісі мен шығысы тіркелмегені анықталған.
Аудит қорытындысы бойынша жалпы сомасы 863 462,8 мың теңге көлемінде бұзушылықтар анықталды.Департамент мамандары мұндай кемшіліктер бюджет қаражатын игеру барысында бақылаудың әлсіздігін және құжаттамаларды рәсімдеу тәртібінің тиісті деңгейде сақталмағанын көрсететінін атап өтті.
Қазіргі таңда анықталған бұзушылықтарды жою және жауапты тұлғалардың іс-әрекеттеріне құқықтық баға беру бағытында тиісті жұмыстар жүргізілуде. Сонымен қатар, болашақта осындай жағдайлардың алдын алу үшін ішкі бақылау тетіктерін күшейту және қаржылық тәртіпті сақтау мәселелеріне ерекше назар аударылуда.