Түркістан облысы бойынша Ішкі мемлекеттік аудит департаменті Жетісай ауданының мәдениет, тілдерді дамыту, дене шынықтыру және спорт бөлімінің Жетісай аудандық орталықтандырылған кітапханалар жүйесі коммуналдық мемлекеттік мекемесінде аудиторлық іс-шара жүргізді.
Аталған аудит «Онлайн бюджеттік мониторинг» жүйесінде тәуекелдер бейіндеріне іліккен еңбекақы төлемдерінің Қазақстан Республикасының бюджеттік және өзге де заңнамаларына сәйкестігін анықтау мақсатында ұйымдастырылды.
Аудит барысында мекеменің қаржылық құжаттары, бухгалтерлік есептері, штаттық кестелері және еңбекақы төлеуге қатысты құжаттары жан-жақты зерделенді. Нәтижесінде аудит объектісінде штаттық кестенің заңнама талаптарына сәйкес дұрыс бекітілмегені анықталды. Соның салдарынан жекелеген қызметкерлерге еңбекақы артық төленген.
Сонымен қатар, кейбір қызметкерлерге жалақының негізсіз артық есептелгені, ал бірқатарына тиісті төлемдердің толық жүргізілмегені белгілі болды. Аудит барысында сауықтыруға арналған жәрдемақыларды есептеу кезінде де қателіктерге жол берілгені анықталды.
Мамандардың айтуынша, мұндай кемшіліктер бухгалтерлік есеп жүргізу барысында заңнама талаптарының толық сақталмауынан туындайды. Осыған байланысты аудит қорытындысымен анықталған бұзушылықтарды жою және алдағы уақытта мұндай жағдайлардың алдын алу бойынша тиісті ұсынымдар берілді.
Департамент тарапынан мекеме қызметкерлеріне түсіндіру жұмыстары жүргізіліп, еңбекақы мен өзге де төлемдерді есептеу кезінде қолданыстағы заңнама талаптарын қатаң сақтау қажеттігі ескертілді. Сондай-ақ қаржылық тәртіпті күшейту, бухгалтерлік есептің сапасын арттыру және ішкі бақылау жұмыстарын жетілдіру мәселелеріне ерекше назар аударылды.
Мемлекеттік аудиттің негізгі мақсаты – бюджет қаражатының мақсатты, тиімді әрі заңды жұмсалуын қамтамасыз ету. Бұл бағыттағы жұмыстар алдағы уақытта да тұрақты түрде жалғасатын болады.