Сыбайлас жемқорлық кез келген мемлекеттің тұрақты дамуына ең елеулі қауіптердің бірі болып табылады. Қазіргі жағдайда Қазақстан Республикасында бұл мәселе ұлттық қауіпсіздіктің негізгі сын-қатерлерімен бір қатарда тұр. Ішкі мемлекеттік аудит органдары үшін осы жағымсыз құбылыспен күрес -жай ғана міндет емес, бүкіл кәсіби қызметтің қағидатты негізі.
Айта кеткім келеді: біздің жұмысымыз бюджет үдерістерінің ашықтығына және халық қаражатын пайдаланудың тиімділігіне тікелей әсер етеді.
Осы бағыттағы қызметіміздің негізі -Мемлекет басшысы бекіткен 2022–2026 жылдарға арналған сыбайлас жемқорлыққа қарсы саясат тұжырымдамасы болып табылады. Аталған құжатты іске асыру аясында ҚР Қаржы министрлігі мен Ішкі мемлекеттік аудит комитеті кешенді сыбайлас жемқорлыққа қарсы бағдарламаны енгізді, ол терең жүйелі өзгерістердің іргетасына айналды.
Ел Президенті «Әділетті Қазақстанның экономикалық бағдары» Жолдауында сыбайлас жемқорлыққа қарсы күрес саласындағы әрекетсіздік құқықтық нигилизмнің өсуіне алып келетінін нақты атап өтті. Біз азаматтардың билік институттарына деген сенімі біздің Департаменттің әрбір қызметкерінің адалдығы мен тазалығына байланысты екенін түсінеміз.
Ақмола облысы бойынша Ішкі мемлекеттік аудит департаментінде сыбайлас жемқорлыққа ықпал ететін себептер мен жағдайларды анықтауға ғана емес, оларды жоюға бағытталған жүйелі жұмыс жолға қойылған. Бұл жұмыс бірнеше негізгі бағыттар бойынша жүргізіледі.
Біріншіден, бақылауды автоматтандыру және цифрландыру аудит объектілерін іріктеу процесінде адам факторын барынша азайтуға мүмкіндік береді. Қашықтықтан мониторинг жүргізу және ақпараттық жүйелерді пайдалану камеральдық бақылауды байланыссыз тәсілмен жүргізуге мүмкіндік береді, бұл аудитор мен тексерілетін субъектінің тікелей байланысын болдырмайды.
Екіншіден, Департаментте сыбайлас жемқорлық тәуекелдеріне тұрақты түрде жүргізілетін ішкі талдау бизнес-процестерді өзін-өзі тексеруге ықпал етеді: біз регламенттердегі «осал тұстарды» анықтап, өкілеттіктерді теріс пайдалану мүмкіндігін болдырмау үшін жедел түзетулер енгіземіз.
Үшіншіден, Әдеп кодексінің сақталуын қадағалап, алдын алу сипатындағы оқыту жұмыстарын жүргіземіз. Алдын алу құқықтық сауаттылықтан басталады. Бізде тұрақты негізде семинар-кеңестер мен «адалдық сағаттары» өткізіліп, «Сыбайлас жемқорлыққа қарсы іс-қимыл туралы» Заң талаптары жан-жақты түсіндіріледі. Әрбір қызметкер сыбайлас жемқорлық құқық бұзушылықтарды жасағаны үшін жеке жауапкершілік қағидаты туралы хабардар.
Төртіншіден, ашықтықты қамтамасыз етеміз: Департамент ашықтық саясатын ұстанады. Аудиторлық іс-шаралардың нәтижелері және анықталған бұзушылықтар туралы мәліметтер бұқаралық ақпарат құралдары мен әлеуметтік желілер арқылы қоғамға жеткізіледі, бұл заң бұзушылықтарға «нөлдік төзімділік» атмосферасын қалыптастырады.
Бесіншіден, кадрлармен жұмыс маңызды. Лауазымдарға тағайындау және аттестаттау жүргізу кезінде үміткерлердің моральдық-адамгершілік қасиеттеріне ерекше назар аударылады. Біз сыбайлас жемқорлыққа қарсы мәдениет әрбір маманның ішкі ұстанымына айналған ұжым құруға ұмтыламыз.
Сыбайлас жемқорлық -тек бірлескен күш-жігер арқылы ғана жеңуге болатын әлеуметтік дерт. Заң бұзушылықтың бірде-бір фактісі жазасыз қалмауы тиіс екенін түсіну маңызды. Құқықтық мәдениетті арттыру және әрбір азаматтың белсенді қатысуы арқылы ғана біз Әділетті Қазақстанды құра аламыз.
Сыбайлас жемқорлыққа қарсы күрес -үздіксіз процесс. Ақмола облысы бойынша Ішкі мемлекеттік аудит департаменті қатарларды тазарту және мемлекеттік қаржыны басқарудың ашықтығын қамтамасыз ету бағытын қатаң әрі ымырасыз түрде жалғастырады. Біздің мақсатымыз -өңір мен бүкіл елдің гүлденуі жолында адал еңбек ету.
Ақмола облысы бойынша Ішкі мемлекеттік аудит департаменті басшысының орынбасары
Әдеп жөніндегі уәкілі
Жапарова Гүлшат Бекетовна