Қарағанды облысы бойынша Ішкі мемлекеттік аудит департаменті 2025 жылдан бастап «Онлайн бюджеттік мониторинг» (бұдан әрі-ОБМ) модулі шеңберінде білім беру, денсаулық сақтау, мәдениет, дене шынықтыру және спорт салаларында еңбекақы төлеуге бағытталған бюджет қаражатының нысаналы пайдаланылуына жүйелі және тұрақты түрде мониторинг жүргізіп келеді.
Аталған мониторингтің негізгі мақсаты – еңбекақыны есептеудің негізділігіне бақылауды күшейту, қаржылық бұзушылықтардың алдын алу, сондай-ақ бюджет қаражатын пайдаланудың ашықтығы мен тиімділігін арттыру.
Мониторинг талдау және анықталған сәйкессіздіктер негізінде қалыптастырылған тәуекел профильдері бойынша жүргізіледі. Тәуекел белгілері анықталған жағдайда, Департамент мониторинг объектілеріне есептеулердің дұрыстығын негіздейтін растайтын құжаттарды ұсыну туралы талаппен жауап хаттарын (хабарламалар) жібереді. Сонымен қатар, тиісті шаралар қабылдау үшін ақпарат бюджет бағдарламаларының әкімшілеріне электрондық форматта жолданады.
Анықталған тәуекелдер расталған жағдайда, мониторинг объектілеріне бұзушылықтарды 10 жұмыс күнінен кешіктірмей өз бетінше жою жөнінде ұсынымдар беріледі. Белгіленген мерзімде талаптар орындалмаған жағдайда, Департамент жоспардан тыс мемлекеттік аудит жүргізу мәселесін қарайды.
2026 жылғы 1 қаңтар мен 31 наурыз аралығында Департамент аталған салаларда ОБМ арқылы еңбекақы төлемдеріне мониторинг жүргізді. Мониторинг нәтижесінде жалпы сомасы 67 872,3 мың теңгені құрайтын 175 тәуекелді төлем бойынша 61 хабарлама жолданды.
Жүргізіліп жатқан жұмыс енгізілген мониторинг тетігінің жоғары тиімділігін көрсетеді, бұл бюджет қаражатын негізсіз жұмсау жағдайларын жедел анықтауға және алдын алуға мүмкіндік береді. Тәуекелге бағдарланған тәсілді қолдану қаржылық бұзушылықтардың азаюына, бюджетті орындау тәртібінің жақсаруына, сондай-ақ бюджет бағдарламалары әкімшілері мен ведомстволық ұйымдардың жауапкершілігінің артуына ықпал етеді.
Жалпы алғанда, «Онлайн бюджеттік мониторинг» модулін іске асыру мемлекеттік қаржыларды басқаруда ашықтық, есептілік және ұтымды пайдалану қағидаттарын қамтамасыз етеді, сондай-ақ бюджет ресурстарын басқару жүйесіне деген сенімді арттырады.