Жетісу облысы бойынша ішкі мемлекеттік аудит департаментімен «Жетісу облысы Кербұлақ ауданының тұрғын үй-коммуналдық шаруашылық, жолаушылар көлігі, автомобиль жолдары және тұрғын үй инспекциясы бөлімі» ММ-де «Кербұлақ ауданы Аралтөбе ауылында сумен жабдықтау жүйесін реконструкциялау және салу» нысаны бойынша шарттық міндеттемелердің орындалуына жоспардан тыс аудит жүргізілді.
Аудит барысында мердігер ұйымның жобалық-сметалық құжаттамаға сәйкес жұмыстарды толық орындамағаны анықталды. Анықталған бұзушылықтардың жалпы сомасы 22 315,2 мың теңгені құрады.
Нәтижесінде азаматтық заңнама, сәулет, қала құрылысы және құрылыс қызметі саласындағы заңнама, бюджет заңнамасы, сондай-ақ мемлекеттік сатып алу туралы заңнама талаптарының бұзылуына жол берілген. Мекеме орындалған жұмыстар көлемінің дұрыстығын тиісті түрде растамаған, соның салдарынан нақты орындалмаған жұмыстар үшін көрсетілген сомаға негізсіз төлем жасалған. Сонымен қатар, тапсырыс беруші жеткізушіні мемлекеттік сатып алуға жосықсыз қатысушы деп тану туралы сотқа талап-арызбен жүгінбеген.
Аудит қорытындысы бойынша Қазақстан Республикасының Әкімшілік құқық бұзушылық туралы кодексінің 207-бабының 10-2-бөлігіне сәйкес әкімшілік құқық бұзушылық туралы хаттама жасалды. Аудит объектісіне анықталған бұзушылықтарды жою және оларға жол берген лауазымды тұлғалардың жауапкершілігін қарау туралы нұсқама енгізілді.
Қазіргі уақытта анықталған бұзушылықтар толық жойылып, 22 315,2 мың теңге бюджет кірісіне өтелді.