Ақмола облысы бойынша Ішкі мемлекеттік аудит департаменті КВр-2,0-Вектор маркалы су жылыту қазандықтарын (6 дана) сатып алуға бөлінген бюджет қаражатын пайдалану мәселесі бойынша ішкі мемлекеттік аудит жүргізді. Аудит барысында Қазақстан Республикасы бюджет және өзге де заңнамасы нормалары талаптарының сақталуы зерделенді.
«Мемлекеттік аудит және қаржылық бақылау туралы» Қазақстан Республикасы Заңының 3-бабы 1-тармағына сәйкес мемлекеттік аудиттің негізгі мақсаты – бюджет қаражатын, мемлекет активтерін және квазимемлекеттік сектор субъектілерінің активтерін басқару мен пайдаланудың тиімділігін арттыру.
Тексеру нәтижесінде 2008 жылғы 4 желтоқсандағы №95-IV Қазақстан Республикасының Бюджет кодексі талаптарынан ауытқулар анықталды. Атап айтқанда, аудит объектісі жасалған азаматтық-құқықтық мәмілелер аясында тауарлардың жеткізілуін, орындалған жұмыстардың және (немесе) көрсетілген қызметтердің нақты орындалуын тиісті деңгейде растамаған. Соның салдарынан су жылыту қазандықтарын сатып алу және орнату бойынша орындалған жұмыстар актілері негізінде бюджет қаражатының негізсіз төленуіне жол берілген.
Сонымен қатар, мемлекеттік сатып алуды жүзеге асырудың негізгі қағидаттары бұзылғаны анықталды. Мемлекеттік сатып алу рәсімдерін өткізбестен, «КВр-2,0-Вектор су жылыту қазандықтарын 6 дана көлемінде сатып алу» бойынша шарт қағаз жеткізгіште негізсіз жасалған.
Анықталған құқық бұзушылықтар бойынша департамент тарапынан аудит объектісінің атына нұсқама шығарылып, бюджетке келтірілген залалды өтеу (аудару) жөнінде тиісті шаралар қабылдау міндеттелді. Бұдан бөлек, мемлекеттік сатып алу рәсімдерін бұзған лауазымды тұлғаларға қатысты «Әкімшілік құқық бұзушылық туралы» Кодекстің 207-бабы 11-бөлігі негізінде әкімшілік құқық бұзушылық туралы хаттама толтырылды.
Қабылданған шаралардың нәтижесінде аудит объектісі 2,9 млн. теңге сомасын аудандық бюджетке аудару арқылы өтеді.
Осылайша, Қазақстан Республикасы бюджет және өзге де заңнамасы талаптарынан анықталған ауытқулар жойылып, жауапты лауазымды тұлғаларға қатысты әкімшілік ықпал ету шаралары қолданылды.