2025 жылға арналған мемлекеттік аудит объектілерінің тізбесіне сәйкес, Астана қаласы бойынша Ішкі мемлекеттік аудит департаменті №8 Қалалық емханасына сәйкестік аудитін жүргізді.
Аудит нәтижесінде емханада бюджет және өзге де заңнама талаптарының шамамен 1,1 млрд теңге сомаға бұзылғаны анықталды, оның ішінде 995,6 млн теңге – қаржылық бұзушылықтар, 116,9 млн теңге – рәсімдік сипаттағы бұзушылықтар.
Аудит барысында емхана әкімшілігі тарапынан таратылған «Достық» алғашқы медициналық-санитарлық көмек көрсету орталығынан берілген негізгі құралдардың бухгалтерлік есеп жүйесінде тиісінше көрсетілмегені анықталды.
Нәтижесінде жалпы сомасы 971,7 млн теңге болатын мүлік уақытылы және дұрыс есепке алынбаған. Бұл бухгалтерлік тәртіптің тиісті деңгейде сақталмағанын көрсетеді және мекеменің активтерін басқарудың ашықтығын төмендетеді.
Сондай-ақ заңсыз сыйақы төлеу, қызметкерлерге еңбекақыны артық төлеу және мемлекеттік сатып алу заңнамасын бұзу фактілері анықталды.
Аудит қорытындысы бойынша медициналық ұйымға анықталған бұзушылықтарды жою және оларды жіберген лауазымды тұлғалардың жауапкершілігін қарау туралы нұсқама жолданды.
Бүгінгі күні нұсқама толық көлемде орындалды: бухгалтерлік есепте негізгі құралдар есепке алынды және 993,6 млн теңге мөлшерінде амортизация есептелді, бюджет кірісіне 2 млн теңге өтелді.
Жіберілген бұзушылықтар үшін емхананың директорының орынбасары тәртіптік жаза ретінде сөгіс алды, бас бухгалтер әкімшілік жауапкершілікке тартылды.