Ұлытау облысы бойынша ішкі мемлекеттік аудит департаменті тарапынан 2025 жылдың тоғыз айында 21 аудиттік іс-шара өткізілді. Тексеру барысында 7 миллиард 882 миллион теңге көлеміндегі бюджет қаражатының пайдаланылуы қаралды. Аудиторлық тексеру нәтижесінде 3 миллиард 190 миллион теңге сомасында бюджет және өзге де заңнамалардың бұзылуы анықталды.
Оның ішінде 2 миллиард 235 миллион теңге – қаржылық бұзушылықтар, ал 955,2 миллион теңге – рәсімдік сипаттағы заңбұзушылықтар. Мемлекеттік сатып алу саласындағы заңнаманы сақтамау фактілері 99,3 миллион теңгеге жетіп, оның 97,1 миллионы тікелей өткізілген тендерлердің нәтижесіне әсер еткен.
Дегенмен қабылданған шаралардың арқасында әділдік біршама қалпына келтірілді: бюджетке 1 миллиард 815 миллион теңге көлемінде қаражат қайтарылды.
Аудит қорытындысы бойынша 19 нұсқама беріліп, 17 лауазымды тұлға тәртіптік жауапкершілікке тартылды. Сонымен қатар 22 әкімшілік хаттама толтырылып, 3 миллион теңге көлеміндегі айыппұлдар толық көлемде өндірілді.
Құқық қорғау органдарына заң бұзушылықтар сомасы 15,8 миллион теңге болатын екі материал жолданып, олардың негізінде екі қылмыстық іс қозғалды, қазіргі таңда тергеу амалдары жүргізілуде.
Бұл нәтижелер тағы бір рет дәлелдейді: мемлекеттік аудит – формалдылық емес, азаматтар мен бюджет мүдделерін қорғаудың нақты тетігі. Себебі бюджетке қайтарылған әрбір теңге – ашықтыққа, жауапкершілікке және әділдікке жасалған нақты қадам.