Мемлекеттік сатып алу – жай ғана бюрократиялық рәсім емес. Бұл – билік тиімділігінің айнасы, ашықтық пен қоғам алдындағы жауапкершіліктің көрсеткіші. Өйткені сөз бюджет қаражаты туралы болып отыр. Сондықтан бұл саладағы кез келген заңбұзушылық ерекше назар аударады.
Ұлытау облысы бойынша ішкі мемлекеттік аудит департаментінің деректері бойынша, 2025 жылдың тоғыз айында камералдық бақылаумен 10,69 млрд теңге сомасына 1566 лот мемлекеттік сатып алу қамтылған. Алайда бұл сандардың артында алаңдатарлық үрдіс жатыр: аудиторлар жалпы сомасы 2,20 млрд теңгеге 56 заңбұзушылық туралы хабарлама жіберген. Көп жағдайда мәселе біреу – мемлекеттік сатып алуды бір көзден алу тәсілін заңсыз қолдану, яғни тікелей шарт жасасу.
Заңға сәйкес, мұндай тәсілді тек ерекше жағдайларда – жедел қажеттілік туған кезде, тауардың бірегейлігі немесе баламалы жеткізушілердің болмауы кезінде ғана қолдануға болады. Алайда тексерулер көрсеткендей, іс жүзінде бұл тәсіл жиі негізсіз пайдаланылады.