Павлодар облысы бойынша ішкі мемлекеттік аудит департаменті жүргізген аудиттік тексеру нәтижесінде «Павлодар облысының қорғаныс істері жөніндегі департаменті» РММ-де мемлекеттік мүлікті есепке алу барысында заңбұзушылықтар анықталды.
Тексеру барысында мекемеде бухгалтерлік есеп Қазақстан Республикасының Бюджет кодексінің және Қаржы министрлігінің №393 және №468 бұйрықтарының талаптарын бұза отырып жүргізілгені белгілі болды.
Бухгалтерлік есеп деректері мен заттай мүлікті есепке алу жөніндегі бастапқы құжаттар арасында жалпы сомасы 262,3 млн теңгені құрайтын алшақтықтар анықталып, бұл 2022 жылдан 2025 жылға дейінгі кезеңге арналған бухгалтерлік баланстардың бұрмалануына әкелді.
Жоспардан тыс жүргізілген түгендеу нәтижелері нақты мүлік қалдықтары мен бухгалтерлік есеп деректері арасында сәйкессіздіктер бар екенін растады. Бұл ішкі бақылаудың әлсіздігін және қаржылық есептілікті жүргізуде заң бұзушылықтардың бар екенін көрсетеді.
Тексеру нәтижелері анықталған кемшіліктердің жүйелі сипатқа ие екенін және қаржылық есептің ашықтығын, дәлдігін және сенімділігін қамтамасыз ету үшін кешенді шаралар қабылдау қажеттігін көрсетті.