2025 жылдың маусым айында «Түркістан халықаралық әуежайы» акционерлік қоғамы мемлекеттік сатып алу веб-порталы арқылы бағалық ұсыныстарға сұраным тәсілімен «Табиғи сүт» өніміне мемлекеттік сатып алуды жариялаған болатын.
Аталған сатып алуға байланысты Қазақстан Республикасы Қаржы министрлігінің Ішкі мемлекеттік аудит комитетінің Түркістан облысы бойынша Ішкі мемлекеттік аудит департаменті тарапынан камералдық бақылау жүргізілді. Бақылау барысында сатып алу техникалық ерекшеліктерінде көрсетілген талаптар сараланып, заңнама нормаларына сәйкестігі жан-жақты талданды.
Камералдық бақылау нәтижесінде сатып алу құжаттамасында ұлттық немесе мемлекетаралық стандарттар көрсетілмегені анықталды. Бұл – техникалық ерекшеліктерді әзірлеу кезінде міндетті түрде ұлттық және мемлекетаралық стандарттарға сілтеме беру қажет деген талаптың бұзылуын білдіреді. Мұндай олқылық өнім сапасына қатысты нақты талаптардың болмауына алып келіп, бәсекелестікке қатысушылар үшін түсініксіздік тудыруы мүмкін.
Анықталған заңбұзушылықтың негізінде «Түркістан халықаралық әуежайы» АҚ-на мемлекеттік сатып алу заңнамасының талаптарына сәйкестендіру туралы ресми хабарлама жолданды. Қазіргі таңда аталған ескертулер толық көлемде орындалып, сатып алу құжаттамасы тиісті тәртіпке келтірілген.
Бұл жағдай мемлекеттік сатып алу жүйесінде техникалық стандарттардың сақталуының маңыздылығын көрсетеді. Камералдық бақылау рәсімі мемлекеттік қаражаттың заңды әрі тиімді жұмсалуына, сондай-ақ сатып алу процестерінің ашықтығы мен әділдігін қамтамасыз етуге бағытталған маңызды құрал болып қала береді.