2025 жылдың шілде айында «Келес ауданы Ақтөбе ауылдық округі әкімінің аппараты» мемлекеттік мекемесі тарапынан мемлекеттік сатып алу веб-порталында бір көзден алу тәсілімен «Көше жолдарын ағымдағы жөндеу» қызметін сатып алу жоспарланған.
Аталған мемлекеттік сатып алуға байланысты Қазақстан Республикасы Қаржы министрлігі Ішкі мемлекеттік аудит комитетінің Түркістан облысы бойынша Ішкі мемлекеттік аудит департаменті тарапынан камералдық бақылау жүргізілді. Бақылау барысында сатып алу сомасына, қолданылған тәсілге және заңнамалық шектеулерге қатысты мәліметтер жинақталып, талданып, бағаланды.
Жүргізілген камералдық бақылау нәтижесінде, сатып алудың жалпы құны ауылдық округтер деңгейінде бір көзден алу тәсілімен сатып алуға жол берілетін шекті мөлшерден асып кеткені анықталды. Яғни, аталған жұмыс көлемі үшін бәсекелестік тәсілдерді қолдану қажет болғанымен, сатып алу тікелей шарт негізінде бір өнім берушіден жасалған. Бұл өз кезегінде мемлекеттік сатып алу рәсімдеріндегі талаптардың сақталмауына алып келген.
Анықталған бұзушылық негізінде, «Келес ауданы Ақтөбе ауылдық округі әкімінің аппаратына» тиісті заңнамалық талаптарға сәйкестендіру туралы ресми хабарлама жолданды. Қазіргі таңда Департамент жолдаған хабарлама толығымен және тиісті дәрежеде орындалған.
Бұл жағдай мемлекеттік сатып алудың ашықтығы мен заңдылығын қамтамасыз етуде камералдық бақылаудың маңызын тағы бір мәрте көрсетті. Мұндай бақылау шаралары бюджет қаражатының тиімді әрі әділ жұмсалуына ықпал етеді және құқық бұзушылықтардың алдын алуға бағытталған тиімді құрал болып табылады.