2025 жылдың шілде айында Түркістан облысы мәдениет басқармасына қарасты «Түркістан облыстық Ы.Алтынсарин атындағы балалар кітапханасы» коммуналдық мемлекеттік мекемесі тарапынан мекелекеттік сатып алу веб-порталы арқылы бағалы ұсыныстарға сұраным тәсілімен «Автомобиль» мемлекеттік сатып алуы жарияланған.
Аталған мемлекеттік сатып алуға байланысты Қазақстан Республикасы Қаржы министрлігінің Ішкі мемлекеттік аудит комитетінің Түркістан облысы бойынша Ішкі мемлекеттік аудит департаменті тарапынан камералдық бақылау жұмыстары жүргізілді. Бақылау барысында ұсынылған техникалық ерекшеліктердегі талаптар жан-жақты зерттеліп, ақпараттар жинақталып, талданып, бағаланған.
Камералдық бақылау нәтижесінде мемлекеттік сатып алу процесінде бірқатар заңбұзушылықтар анықталды. Атап айтқанда, техникалық ерекшелікте белгілі бір автокөлік қозғалтқышының нақты атауы көрсетіліп, ол арқылы тек жекелеген өнім берушілерге ғана сай келетін талап қойылған. Мұндай талап әділ бәсекелестікті шектеп, өзге өнім берушілердің қатысу мүмкіндігін шектейді.
Осыған байланысты, Түркістан облысы мәдениет басқармасының «Түркістан облыстық Ы.Алтынсарин атындағы балалар кітапханасы» мекемесіне мемлекеттік сатып алу заңнамасының талаптарына сәйкестендіру туралы ресми хабарлама жолданды. Нәтижесінде, аталған мемлекеттік мекеме тарапынан департамент жолдаған ескертулер толық көлемде орындалып, мемлекеттік сатып алу құжаттамасы тиісті талаптарға сәйкестендірілді.
Бұл жағдай мемлекеттік сатып алудың ашықтығы мен әділдігін қамтамасыз ету мақсатында камералдық бақылаудың маңыздылығын көрсетіп отыр. Мұндай шаралар мемлекеттік қаражаттың тиімді және заңға сай жұмсалуына оң әсерін тигізеді.