Түркістан облысының білім басқармасына қарасты Сарыағаш ауданындағы А.Сүлейменов атындағы мектепте ішкі мемлекеттік аудит жүргізілді. Тексеру «Онлайн бюджеттік мониторинг» жүйесі арқылы анықталған тәуекелдерге байланысты жүргізілді.
Аудит барысында бірқатар қызметкерлердің еңбекақы төлемдерінде заңнамаға сәйкес келмейтін жағдайлар тіркелген. Кейбір қызметкерлерге артық төлем жүргізілген болса, басқа бірқатарына жалақы кем берілген фактілер анықталды. Сондай-ақ, сауықтыруға арналған жәрдемақылардың есептелуінде де қателіктер орын алған.
Мекеме тарапынан жолданған есептіліктерде салық төлемдері бойынша сәйкессіздіктер болғаны байқалды. Бұл жағдай мекеменің бухгалтерлік есеп жүргізуінде олқылықтар бар екенін көрсетті.
Аудит қорытындысымен жауапты есепшінің өз міндетін тиісінше атқармағаны белгілі болды. Нәтижесінде дебиторлық және кредиторлық қарыздар қалыптасқан.
Департамент тарапынан мекеме қызметкерлеріне түсіндіру жұмыстары жүргізіліп, жалақы мен өзге төлемдерді есептеу тәртібін қатаң сақтау, артық түскен қаражат жөнінде дер кезінде басшылыққа және құзырлы органдарға хабарлау ұсынылды.
Аудиттің түпкі мақсаты – мемлекеттік қаржының мақсатты әрі заңды жұмсалуын қамтамасыз ету.