Қаржылық есептілікті депозитарийге тапсыру тәртібі мен мерзімдері туралы

Қазақстанда жария мүдделі ұйымдар үшін жылдық қаржылық есептілікті тапсыру қағидалары қолданылады. Ондай ұйымдарға акционерлік қоғамдар (коммерциялық емес АҚ басқа), жер қойнауын пайдаланушылар (жалпы таралған пайдалы қазбаларды өндірушілерді қоспағанда), қаржы ұйымдары (айырбастау пунктерінен, кредиттік серіктестіктерден, жауапкершілігі шектеулі серіктестік түріндегі ломбардтардан, кепілсіз микрокредит бермейтін ЖШС нысанындағы микрофинанстық ұйымдардан басқа), астық қабылдау кәсіпорындары, мемлекеттік қатысуы бар ұйымдар жатады.

Аталған ұйымдар жыл сайын белгіленген мерзімде уәкілетті орган айқындаған депозитарийге қаржылық және (қажет болған жағдайда) аудиторлық есептілікті электрондық түрде тапсыруға міндетті.

 

«Жария мүдделі ұйымдардың қаржылық есептілікті депозитарийге тапсыру қағидаларын бекіту туралы» Қазақстан Республикасы Қаржы министрінің 2022 жылғы 28 қаңтардағы № 94 бұйрығына сәйкес, жария мүдделі ұйымдардың қаржылық есептілікті Депозитарийге тапсыру тәртібі белгіленген.

Есептілікті тапсыру тәртібі мен мерзімі

Жария мүдделі ұйымдар жыл сайын, есепті жылдан кейінгі жылдың 31 тамызынан кешіктірмей,
депозитарий қызметін жүзеге асыратын уәкілетті орган айқындаған ұйымға (бұдан әрі – Уәкілетті ұйым)
заңнамаға сәйкес бекітілген жылдық қаржылық есептілікті тапсыруға міндетті.

Есептілік уәкілетті орган бекіткен нысандар мен тізбеге сәйкес жасалады.

• Жаңадан тіркелген ұйымдар – өздерінің тіркелген күнінен бастап сол жылдың 31 желтоқсанына дейінгі аралықтағы есептілікті тапсырады.
• Еншілес ұйымдары бар ұйымдар – қосымша түрде жылдық шоғырландырылған қаржылық есептілікті тапсырады. Бұл есеп Қазақстан Республикасының бухгалтерлік есеп пен қаржылық есептілік туралы заңнамасына сай жасалуы тиіс.

Аудиторлық есеп

Аудит өткізу міндетті болып табылатын ұйымдар:

• Аудиторлық қорытындыны PDF форматында (аудиторлық ұйым қол қойып, мөрмен растаған қағаз нұсқасының сканерленген көшірмесі) ұсынуға міндетті.
• Егер ұйымның еншілес ұйымдары болса — шоғырландырылған қаржылық есептілік бойынша аудиторлық есеп тапсырылады.

Сонымен қатар, ұйымдар ынталы (ерікті) аудиттің нәтижесі бойынша да есеп тапсыруы мүмкін.

Есептілікті тапсыру талаптарын бұзғаны үшін жауапкершілік

Қазақстан Республикасы Әкімшілік құқық бұзушылық туралы кодексінің 239 және 250-баптарына сәйкес,
келесі құқық бұзушылықтар үшін әкімшілік жауапкершілік қарастырылған:

• қаржылық есептілікті тапсырудан бас тарту;
• белгіленген мерзімдерде ұсынбау;
• негізсіз себепсіз мүлде ұсынбау;
• міндетті аудиттен жалтару;
• аудит жүргізуге кедергі келтіру.

2024 жыл бойынша қорытынды

2024 жылға қаржылық есептілікті уақтылы тапсыру мәселесі бойынша жүргізілген талдау нәтижесінде:
4 жария мүдделі ұйым Қостанай облысы бойынша ішкі мемлекеттік аудит департаментімен әкімшілік жауапкершілікке тартылып, жалпы сомасы 1 015 300 теңге көлемінде айыппұл салынды.