Қазақстан Республикасының Денсаулық сақтау министрлігіне қарасты Санитариялық-эпидемиологиялық бақылау комитетінің «Ұлттық сараптама орталығы» шаруашылық жүргізу құқығындағы республикалық мемлекеттік кәсіпорнының Түркістан облысы бойынша дезинфекция орталығында жүргізілген ішкі аудит барысында бірқатар қаржылық және ұйымдастырушылық бұзушылықтар анықталды.
Аудит нәтижесінде орталық директоры тарапынан мемлекеттік сатып алу рәсімдерінде белгіленген талаптардың сақталмағаны белгілі болды. Атап айтқанда, бір көзден алу тәсілімен жасалған қызмет көрсету шарты заңнамада бекітілген мерзім талаптарына сәйкес келмеген. Бұл әрекет үшін жауапты лауазымды тұлғаға айыппұл салынған.
Сонымен қатар, көрсетілген қызметтерге қатысты бірнеше негізсіз төлем фактілері анықталды. Атап айтқанда, ақпан айында жеңіл автокөлік қызметіне жасалған төлемдердің ішінде 0,85 млн. теңге сомасындағы қаражат нақты қызмет көрсетілмеген күндерге төленген. Бұл қаржы тиісті құжаттармен расталмаған, нәтижесінде бюджет қаражатының тиімсіз пайдаланылуына жол берілген. Алайда келтірілген залал толығымен өтелген.
Осыған ұқсас тағы бір жағдайда, дәл сол автокөлік қызметі үшін 13 жұмыс күніне 1, 392 млн теңге төлем жүргізілгенімен, нақты қызмет көрсетілмегені анықталды. Бұл жағдай да қажетті құжаттық негізсіз төленген сома ретінде танылып, бюджетке келтірілген зиян өтелді.
Аудит нәтижелері орталық басшылығы тарапынан мемлекеттік қаражатты басқарудағы бақылаудың әлсіздігін және рәсімдердің тиісті деңгейде орындалмағанын көрсетеді. Қаржылық тәртіпті күшейту және осындай бұзушылықтардың алдын алу мақсатында жауапты тұлғаларға түсіндіру жұмыстары жүргізілді.
Мемлекеттік аудит органдары бюджет қаражатының тиімді және мақсатты жұмсалуы – халық сенімін арттырудың басты кепілі екенін еске салады. Алдағы уақытта да мұндай тексерістер жүйелі түрде жалғасатын болады.