Қазақстан Республикасы Қаржы министрлігінің Ішкі мемлекеттік аудит комитеті уәкілетті органның қызметіне тікелей және жанама қатысты қызмет пен нормативтік-құқықтық актілерге тұрақты түрде мониторинг жүргізіп, оларды өзектендіріп отырады.
Осы ретте, Мемлекет басшысының тапсырмасына сәйкес, 2025 жылғы 1 қаңтардан бастап күшіне енген «Мемлекеттік сатып алу туралы» жаңа Заң қабылданып, мемлекеттік сатып алу нәтижелерін шағымдану процесінде мемлекеттік аудит органдарының рөлі едәуір өзгертілді.
Осыған байланысты Қаржы министрлігі Ішкі мемлекеттік аудит комитетімен бірлесіп, камералдық бақылау жүргізу қағидаларын өзектендіру жұмыстарын жүргізді. Атап айтқанда, сатып алу нәтижелеріне шағымдарды қарау функциясы алынып тасталды, үшінші және төртінші бағыттар бойынша 11 тәуекел профилі қысқартылды.
Қазіргі уақытта Комитет камералдық бақылау процесін оңтайландыру бойынша жұмыстарды жалғастыруда. Атап айтқанда, адам факторын болдырмау мақсатында бірқатар функцияларды автоматтандыру, мемлекеттік сатып алу веб-порталында форматтық-логикалық бақылау орнату және өзге ақпараттық жүйелермен интеграция жасау бойынша ұсыныстар әзірленуде. Бұл бұзушылықтарды нақты уақыт режимінде автоматты түрде анықтап, оларға жедел әрекет етуге мүмкіндік береді.
Камералдық бақылау үдерістерін үздіксіз жаңғырту веб-порталды автоматтандыруға, жаңа технологияларды енгізуге, сондай-ақ мемлекеттік сатып алу процесіне қатысушылардың құқықтары мен заңды мүдделерін қорғауды жақсартуға бағытталған.