Түркістан облысының Ауыл шаруашылығы басқармасы тарапынан 2021–2024 жылдар аралығында Сауран ауданының шаруа қожалықтары мен кәсіпкерлеріне мал шаруашылығы мен тұқым шаруашылығын дамытуға бөлінген субсидиялардың тиімділігіне қатысты Түркістан облысы бойынша Ішкі мемлекеттік аудит департаменті аудиторлық тексеріс жүргізді.
Аудит барысында жалпы сомасы 276,7 млн теңгеге жуық бұзушылықтар анықталды. Оның ішінде 147,6 млн теңге қаржылық сипаттағы, ал 129,1 млн теңге рәсімдік сипаттағы бұзушылықтар болып табылады.
Нақтырақ айтқанда, 2019 жылы басқарма тарапынан субсидиялау үшін таңдалған таңқурайдың «Награда» сұрыпы белгілі бір өңірлерге ғана бейімделіп, ресми тізілімде Түркістан облысында пайдалануға рұқсат етілмегеніне қарамастан, бұл сұрыпқа 125,2 млн теңге көлемінде қаржы бөлінген. Яғни, қолдануға ұсынылмаған өнімді қаржыландыру арқылы бюджеттік негізділік пен тиімділік талаптары сақталмаған.
Сонымен қатар 2021–2024 жылдар аралығында Сауран ауданындағы 27 шаруа қожалығы мен кәсіпкерге мал шаруашылығы өнімдерінің өнімділігі мен сапасын арттыруды, асыл тұқымды мал шаруашылығын дамытуды көздейтін субсидиялар белгіленген шарттар сақталмай берілген. Бұл жағдай 147,6 млн теңгені құрайды.
Анықталған заңбұзушылықтар бойынша Түркістан облысының Ауыл шаруашылығы басқармасына тиісті нұсқама жолданып, олқылықтарды жою және жауапты тұлғалардың әрекеттеріне баға беру тапсырылды.
Аудиторлық іс-шараның нәтижелері бюджеттік қаражаттың тиімді әрі мақсатты жұмсалуы қажеттігін тағы бір мәрте айқындап берді. Мұндай тексерістер мемлекеттік қаржының ашықтығы мен заңға сәйкестігін қамтамасыз етуде маңызды рөл атқарады.