Мектептерге жүргізілетін мемлекеттік аудит білім беру ұйымдарының жұмысын ашықтық және тиімділік тұрғысынан қамтамасыз етуде маңызды рөл атқарады. Ол бюджет қаражатының қаншалықты тиімді және ашық жұмсалып жатқанын, мемлекеттік білім беру стандарттарының сақталуын, оқушыларға қауіпсіз және қолайлы жағдай жасалып жатқанын объективті түрде бағалауға мүмкіндік береді.
Осылайша, Астана қаласы әкімдігінің «Төлеген Айбергенов атындағы №16 орта мектебіне» жүргізілген аудиттің қорытындысы бойынша, Астана қаласы бойынша Ішкі мемлекеттік аудит департаменті жалпы сомасы 144,3 млн теңге көлемінде бұзушылықтарды анықтады.
Атап айтқанда, қаржылық бұзушылықтар — 33,9 млн теңге, мемлекеттік сатып алу туралы заңнаманың бұзылуы — 66,2 млн теңге, рәсімдік бұзушылықтар — 44,2 млн теңге.
Мектеп әкімшілігі мақсатты трансферттерді қайтаруды жүзеге асырмағаны, ғимаратты жалға алушылар тарапынан коммуналдық төлемдер бойынша берешектің жіберілгені, қаржылық есептіліктің жүйелі түрде бұрмаланғаны және қызметкерлерге еңбекақы есептеу тәртібінің бұзылғаны анықталды.
Анықталған заңбұзушылықтар үшін жауапты лауазымды тұлғалар әкімшілік жауапкершілікке тартылды.
Аудит қорытындысы бойынша Астана қаласының №16 орта мектебіне анықталған бұзушылықтарды жою және кінәлі тұлғаларды жауапкершілікке тарту жөнінде нұсқама берілді.
Қазіргі уақытта бұл нұсқама толық көлемде орындалды. Жергілікті бюджетке 9,3 млн теңге қайтарылды. Жауапты қызметкерлерге сөгіс түріндегі тәртіптік жаза қолданылды.