Астанада мемлекеттік сатып алу саласындағы заңнаманың сақталуына бақылау жүргізу бойынша жүйелі жұмысын жалғастыруда. Камералдық бақылау аясында мемлекеттік сатып алудың тапсырыс берушілерінің атына бір көзден сатып алу тәсілін қолдану кезінде анықталған бұзушылықтар бойынша 61 хабарлама жолданды. Бұл хабарламалармен қамтылған сатып алулардың жалпы сомасы 452,1 млн теңгені құрады.
Жүргізілген талдау 2025 жылғы 1 қаңтардан бастап заңнамаға енгізілген өзгерістерге қарамастан, бірқатар мемлекеттік ұйымдардың тәжірибесінде шарттарды тікелей жасасу жолымен бір көзден сатып алу тәсілін заңсыз қолдану фактілері әлі де кездесетінін көрсетті.
Ең жиі кездесетін бұзушылық — сатып алудың бұл тәсілін қолдануға мүмкіндік беретін бәсекелестікті қорғау және дамыту саласындағы уәкілетті органның міндетті қорытындысының болмауы. Атап айтқанда, ағымдағы жылдың басынан бастап мұндай сатып алуларды уәкілетті органмен келісу міндетін көздейтін нормалар күшіне енді.
Аталған талапты елемеу Қазақстан Республикасының «Мемлекеттік сатып алу туралы» Заңының бұзылуына алып қана келмей, сонымен қатар бірқатар елеулі тәуекелдерді туындатады: бәсекелестіктің шектелуі, бюджет қаражатының тиімсіз жұмсалуы, ал кейбір жағдайларда — сыбайлас жемқорлық құқықбұзушылықтарының белгілерінің орын алуы.
Процедуралардың сақталуына бақылау жалғасатын болады. Мемлекеттік сатып алулар жүйесін жетілдіру және бюджет қаражатын тиімді пайдалану аясында заңдылықты, ашықтықты және адал бәсекелестікті қамтамасыз ету — негізгі басымдықтардың бірі болып қала береді.